بورسعيد.. عبقرية المكان والميلاد

آه وألف آه.. تعبت من كتر الآهات.. في ذلك الزمن البزرميط!
بنيتي.. آه بنيتي!!.. خلاص العمر عدى وراح.. ولم يتبق «إلا» الذكريات.. ذكريات جملة رقيقة كانت في مراحل العمر الأولى، وذكريات لئيمة خسيسة طاعنة في الخيانة والنفاق المر.. والألم الدامي والجحود.
أصل الموضوع.. موضوع إحساس مكتسب من عبقرية المكان وترنيمات وهمسات الصحبة والأهل والخلان ورد فعل قوي ينعكس على كل مناحي الحياة من عدم وجود القدوة في المجتمع.. والفساد واللعب بعقول البشر والضحك عليهم ومخاطبة قلوبهم وليس عقولهم.. فيسقط الورق من على فروع الشجر ويتعرى الجسد ويجري من غير هدف في أماكن تظللها الغربان وينعق البوم.
سقط رأسي على أرض كان الظلام فيها حالكا وزجاج العمارات مطليا بالأزرق لعدم نفاذ الضوء وعيون الرعب من صوت القنابل والصواريخ وأزيز الطائرات حيث نهائيات الحرب العالمية الثانية وإلحق يا جدع طفي النور والكل بيجري من هنا إلى هناك.. رعبا.
صرخت أمي وصرخ الجميع.. الواد وضعه غلط.. ياه من أولها!! الحق يا حكيم، وحضر د. يوسف خليل يلهث متألما لألم أمي التي ظلت تصرخ وتصرخ حتى غابت عن الوعي.
عندها صرختي دوت في سماء المكان بصوت مخنوق ضعيف وفاقت أمي لحظة بنظرة فاحصة وسقط رأسها مرة أخري في غيبوبة وسط ذهول الجميع لعودة الأنوار مع أول صرخة لي، وانتهت الغارة وارتفعت أصوات صفارة انتهاء الغارة المتقطعة كأنها الزغاريد التي تطلقها دادة غنية ودادة أم محمود المخلصتان.. زمن وراح!!!
يوسف خليل خلع الجونتي والكمامة والمريلة، مبسوط يا كامل بك جالك ولد يا عم حظك حلو في البلياردو وفي الخلفة.. نادي المسرح كله بتخليه.. لا يا عم مش حلعب معاك تاني وضجت القاعة بالضحك بعد أن قال أصلي زهقت من خلفة البنات.. هو طبيب وصديق العائلة وخلفته كلها بنات.
دنيا غريبة.. جنين تحول بقدرة قادر كريم الى إنسان مكلبظ.. أحمر الوجه والجسد كأنه خارج من فرن الحديد والصلب.. تقولش أبوه انجليزي!
حوشوا الواد بيصرخ.. الود جعان!! اسكت إنت ده شغل حريم.. تعالى لما نشوف حنعمل إيه.. طب يا خال لما أبوس الواد وأفرح بيه شوية!! هي الطاولة ختخلص!!! ومرت الأيام والسنون.
أوعى تروح عليكي نومة بكرة أول يوم للواد في المدرسة.. إيه الحلاوة دي مريلة تيل نادية وبليزر أحمر وزراير نحاس كمان؟.. يا الله يا حبيبي على مدرسة الواصفية، ما تخافش.
ده آخر يوم في المدرسة.. حتوحشيني يا أبلة.. لأ لأ إنت بقيت راجل صغير رايح المدرسة الجديدة.. حتاخد الابتدائية.. عايز تطلع إيه؟ قوللي؟ مش عارف يا أبلة.. لأ لأ بلاش تعيط!!
إيه الدروس الصعبة دي ومدرسين زي أبويا لا بيضحكوا.. مفيش حد زي أبلة فاطمة معيط.. طول النهار نازلة فينابوس.. قال إيه بقينا رجالة؟.. يا سلام!!
الأيام بتمر وعبقرية المكان تطبع على فكري حكاوي وحكايات بورسعيد تقولش فينيسيا مصر.. لأ لأ.. دي ولا نيس فرنسا.. فعلاً تحفة المكان والطرز المختلفة وخليط من شعوب العالم بجماله وأناقته ونوادره وسهراته وعاداته.
ناس حلوة ونظيفة.. كل شىء نظيف.. كل شىء بضمير.. موديلات أوروبا أخلاق بريمو.. زوق إيه!! موسيقى في كل مكان.. الكل بيضحك، رقص.. وغناء كازينوهات وكازينو بالاس وجيانولا وسبلندد وكازينو الجزيرة داخل البحر والشوتنج أطباق وحمام وطيور النورس تحلق فوق سطح مياه زرقاء صافية وبيوت من الرمال.
بورسعيد تزين المدخل الشمالي لمصر المحروسة وتدخل في حضن مصر الدافئة حيث الشاطئ ولعبة الراكيت وركوب العَجَل والحصان وشد الحبل والنطة.
كانت مدرسة الواصفية بداية الطريق نحو المعرفة.. أبلة فاطمة معيط أول من علمني حرفاً رحمها الله.. فوجئت بها أمامي مُتكئة على عصا تتحرك بصعوبة في صيدليتي حيث كانت الدهشة مع الصدمة مع الفرحة مع شريط ذكريات مضت مر عليها أكثر من 35 عاماً.
اندفعت واندفعت الدموع من عيني ووجدت نفسي جاثما على ركبتي أقبل يديها بين دموعها وأحضانها فرحاً وهى تنادي «ابني الغالي» الحمد لله.. شفتك قبل ما أموت.. اعذرني عزيزي القارئ لابد أن نكمل شريط الذكريات.
المنسق العام لحزب الوفد