غنى البلبل لحن هنايا

غني البلبل لحن هنايا وبيجني نعيم الدنيا معايا، وبعد الفرقة يا قلبي لقيتك، ومين قبل كده في جمالك أتمنيته، والقسوة خلت الأيام مرة، والنبي الغالي خلي قسوتها بحنية لحسن إيدي وعنيه شافوا الويل من كتر البكا والنوح علي حبيبتي بعدما طال الفرج وكتر السؤال وتاهت الخطا ودابت الأقدام وعرفت معني الذل والقهر والحرمان.
يا حبيبتي يا بنتي معلش ارضي بالقليل وحاولي تعيشي طبعاً يا ريت متهنية، والنبي دي عنيه تتمني تشوفك يا حبيبتي حاضنة بنتي ومخللها الدنيا مبتسمة فأنا وإنت والدنيا معاكي يا حبيبتي مبتسمة وغني يا ليل لحن هنايا وأجني نعيم الدنيا معايا لأن حبيبتي بدلت ثوبها وفردت شعورها وهتنهض حالاً من تحت التراب لتقابل بعيونها خيوط الشمس الذهبية اللي كانت غايبة وسط الغيطان وجوه الكهوف بتدور علي بنتي تنور لها طريقها.
فينك يا حامولي ويا سيد درويش تسمعنا صوت العصفور وأحلي الكلام فأنا عطشان حب وحنان، عطشان جناحين للريش لأطير بيهم وأحقق كل الأحلام وأتوه في كلام وساعات وحروف وثواني، أصل الحب إحساس.
أصل أنا عطشان والحروف ضاعت واختفي الكلام، حبي لك فرح ونسيم وميه وفلاحين وأغاني وكلام وساعات وحروف وثواني عطشان ياعالم عطشان، والميه تروي العطشان وتخلي دمه بلون ورد الربيع.
كل لحظة نعاني!! معلش أصل ساكن في قلبي حبها وعلي دقته نكتب أغانينا وأنسي اسمي باسمها وندوب في طينها وفي حضنها وأفرش لها عنيه، علي كل حجر أو عامود الساقية وعلي قناية بتجري فيها المياه لتروي العطشان.
من كتر حبي يا حبيبتي نسيت ومش عارف مين أنا.. أنا ابن الفرعون اللي بني الهرم وأبوالهول؟.. وألا ابن النيل اللي ارتوي بميته وبلل هدمته وزرع زرعته، ما أنا ابنك وحبيبك يا أرض الطينة السمرا والرملة الصفرا وبير الغاز وغوايش صبايا وعرسان، وحلقان الحور وعرايس الجان.
ما انتي يا حبيبتي علمتيني أثور، وكسرت حاجز الخوف وعمر ما هيعيش بينا ديكتاتور، وهعيش اللي فاضلي من عمري أعد سنابل القمح وحروف الجر اللي هتقدم الخير وتبعد الشر عن بنتي وولادي وحبابيي عصافير الجنة.
الأولة في الكلام علشان ما تدوخشي ورايا عزيزي القارئ.. هي ملحمة حب.. حب حقيقي بطعم المرارة وطعم السعادة وطعم الكفاح والأماني وطعم الخيال كمان.
الحلم لسه مستمر ليل نهار، ما هو حلم عمري اللي راح، عمال أدور وألف ورا حبيبتي المنورة ورا ستارة من غبار الزمن والخيانة والمؤامرة ودلع العذاري.
حب زقزقة العصفور وصوت النورج وخرير الميه علي ناصية قناية بتسقي زرعة ورد وزهرة قطن مفتحة بالخير، وصوت ناي بينعي علي حاله تحت شجراية جميز تنفذ منه أشعة ذهبية لشمس العصاري وهي مروحه لليل غطيس أسمع فيه عواء ديب متربص يبحث عن فريسة سهلة بين عيدان القصب في ليل بهيم، السكون فيه يبعث عن الخوف والحلم في وقت واحد ما هو الحلم عمره ما ينتهي وهيدوم ما دامت الحياة بحلوها ومرها.
ربنا خلقنا نعيش ونحلم ونتعذب بإيدين بعض، حاجة غريبة ناس تعذب ناس ولو جت ناس تعذب الناس تزعل.. طب بتزعل الناس إزاي ومش عايز حد يزعلك، هي دي الدنيا أبدان بتتسلط علي أبدان!
الحلم ساير ومستمر ليل نهار.. ما هو حلم عمري اللي راح وأنا بدور وألف ورا حبيبتي المنورة ورا ستار من غبار الزمن والخيانة والمؤامرة فالعرض مستمر مهما طال الزمن، اتعودنا علي كده، ربنا يجازي اللي كان السبب.
كنا في حالنا وخيرنا مغرقنا وأخلاقنا حاضنة تصرفاتنا، وسلوكنا معشش بالحب والكمال والقناعة والصبر وحلو الكلام، تيارات وأيديولوجيات خربت الدماغ ودخلت صراصير الفساد في كل مكان، فلسفة وعنتظة ومنظرة وحبيبتي مفيش.
فيه حد يا ناس يدمر بلده ويحولها إلي خرابة وجثث ونار في كل مكان؟!!.. ناس ضايعة وتايهة وبتبحث عن قوتها في صناديق الزبالة؟.. يا خسارة وألف خسارة فيه ناس كده؟!.. آه طبعاً الحرامية وأهل الثقة وحاملي المباخر والمنافقين وناهبي الأرض والأعراض، الناس تحولت إلي وحش كاسر يبحث فقط عن الجنيه والدولار والحلال والحرام خلاص عندهم ما بقاش بيَّن ولكن غض الطرف بقه سمة عن كل محاسن الدنيا والآخرة.
حكامنا علي مدار ستين سنة حولوا حبيبتي إلي خرابة وصحراء جرداء، يسكنها ناس كانوا زينة الدنيا تحولوا إلي أصنام بلا إحساس ولا انتماء وبيصوتوا وبيزعقوا طوال اليوم وبيجروا من هنا إلي هناك بلا هدف ولكن بحثاً عن المخلص زي المهاويس ومهابيل سيدي المهووس.. أين المخلص؟.. أين المخلص؟
والكل بيدعي أنه مشغول وبيشتغل، حولوه إلي آلة خربة بتدور وتستهلك كهرباء ولا تعطي ناتج أو خير، والله حرام عليكم منكم لله فرداً فرداً من دمر حبيبتي وسحب وحجب خيوط شمس الحرية والإنسانية من سمائها وحول الأرض والغيطان إلي بوار وظلام وبؤر إجرام.
يا حبيبتي أنا مستني وحاطط إيدي علي قلبي وعمري ورايا وفاضل شعاع الأمل بحلم يداعب خيالي فمازال نور الصباح يحاول أن يسطع ويغطي أرض حبيبتي بالخير ويبدر قوت الغلابة علي ذيل فستان صبية تعيش الأمل لتري بكره غير بكره اللي عدي قبل كده.. أحلم معي عزيزي القارئ، فالأمل مازال قائماً يمكن بنتي تقدر تعيش وتسعد وتحقق حلمها.. الفرج من عنده علشان يغني البلبل لحن هنايا.
د. وفيق الغيطاني
المنسق العام لحزب الوفد