مفيش نبى اسمه مرسي

خلاص كل شيجن انكشفن وبان واتضح ان مفيش نبي اسمه مرسي ولا ان النبى محمد صلى الله عليه وسلم قال عنه يصلى بينا إمام واتضح كمان ان جبريل عمره مانزل على الأرض بعد موت سيدنا محمد عليه الصلاة والسلام وان اللى كان بيقول انه شافه فى إشارة رابعة عند اعتصام الإخوان طلع جخاخ
. ولان كل شيجن انكشف وبان لم يجد الإخوان بدا من التهويش واستخدام الإرهاب ويا إما اشرب واستطعم يا إما تزعل وتبرطم يعنى يا إما يحكمونا بالاغتصاب وبالعافية يا أما يولعوا فينا. ورغم ان كل شيجن انكشفن وبان وعلاقتهم بالأمريكان واليهود بقت فضيحة بجلاجل الا انهم لا يخجلون من هذه العلاقة الداعرة فقد كانوا يصدعوننا كل يوم على القدس رايحين شهداء بالملايين وان المخلوع اللى قبل مرسي كان عميلاً للأمريكان واحنا بتوع الشريعة والشرعية وكل ده طلع أونطة ودجل وضحك بالدقون عالدقون ولم يخجل البلطاجى من التهديد الصريح بأن عمليات إرهابية كبيرة حتحصل فى سينا وغيرها ولو مرسي رجع مش حتحصل وكل الإرهاب يقف. يا راجل ده اعتراف رسمى فهمى نظمى بانكم رعاة الإرهاب. على العموم الشعب ما بينساش وإذا كان الشعب النهاردة بيقول لكم تعالوا معانا أنتم مننا شاركوا فى الحكومة ولن يتم إقصاء جماعتكم إلا إنكم تصرون على الكبر والعناد لأن أمريكا لسه لم تعطكم أوامر بفض الاعتصام، سيبكم بقى من الأمريكان وأرجعوا لحضن الشعب وخليكوا حلوين وجماعة دعوة إلى الله بالحكمة والموعظة الحسنة قبل ما ينكشف المستخبى اللى هو أكثر بكتير من اللى انكشفن وبان وخلاص الشعب مبقاش يأكل من الكلام انه انتم مظلومين ومضطهدين وان انتم بتوع ربنا وان الإسلام من بعدكم فى خطر. لا لا لا الشعب عرف ان أنتم كدابين أوى والدين بالنسبة لكم وسيلة لركوب السلطة والتعالى على خلق الله والانتقام الرهيب من كل من لاينتمى إلى جماعتكم المحظورة الإرهابية ولازم تتحل الجماعة وكفاية عليكم اسم النبى حارسه حزب الحرية والعدالة لو عايزين تلعبوا سياسة تانى. وإزاى عاوزين حد يصدقكم وانتم تقولون شهداء فداء لمرسي.. إلا محمد مرسي.. هو مرسي ده كان نبى ما هو إلا رئيس اخل بشروط تعاقده مع الشعب فخلعه وطرده كما خلع من قبله وسيخلع من بعده اذا اخل بشروط التعاقد. وبعدين مرسى بنفسه فى آخر خطاب قال كفاية سنة هو صحيح كان يقصد انه يقفل كل القنوات والجرايد ويلغى كل حاجة فى مصر مهيش إخوان ولكن الشعب فهم انه يقصد كفاية استحملتونى أنا وعشيرتى سنة هو عارف انه سقيل بس باسم يوسف مش هيعرف يشتغل وادوية الضغط والسكر حتتوفر والناس حترجع تتفرج على أفلام ومسرحيات كوميدى بعد ان انتهت إلى الأبد خطابات مرسي.