طلاق ماما أمريكا

أهم شخصية فى مصر الآن ليس المرشد ولا الشاطر ولا مرسي ولا الكتاتنى ولا البلتاجى ولا العريان ولا حتى البرنس اللى أتصور مع صحبة سنابل قمح يبشرنا بالاكتفاء الذاتى.. أهم شخصية فى مصر الست آن باترسون السفيرة الأمريكية أو المندوب السامى الأمريكانى،
تماما كما كان يحدث أبان الاحتلال حيث كان المندوب السامى البريطانى أهم واحد فى مصر وهو الذى يحدد من يحكم ومن يذهب. ولان باترسون تقول والكل يسمع، فى الأول قالت الإخوان أحسن ناس وهم افضل من يحكم مصر وبعدين قالت إن الجيش ليس من شأنه الدخول فى السياسة وبعدين قالت بس الإخوان عاوزين تعديل بسيط أو (تأييف) بمعنى نحل لهم بعض المشاكل مثل أزمة السولار والبنزين والدولار وانقطاع التيار الكهربائي ونهىء لهم الجو وبعدين نقول لهم كفاية ملاحقة للإعلاميين وكفاية صدام مع القضاء وبعدين خدوا معاكم كام وزير فلول وصلحوا الأمور معاهم ونشوف.
وبعدين طيب يا جماعة ياللى فى المعارضة ويا أهل مصر انتم عاوزين إيه من الحكم استقرار وعيش وحرية خدوا بس سيبوا الإخوان، وعلى رأى المثل المصري القديم إنتم عاوزين أكل ولا (بحلقة) وعلى رأى المثل اللبنانى الخطير أنتم عاوزين عنب ولا عاوزين تقتلوا الناطور اللى هو يعنى الخفير بتاع الكرم طبعا معظم شعب مصر عاوز عنب وعاوز أكل والنخبة عاوزة حاجة تانية وعلشان كده ماما أمريكا قالت طيب لو خلعنا الإخوان من الحكم مين جاهز يا أولاد يمسك البلد ويحكم وينفذ طبعا مفيش حد جاهز ومنظم إلا الجيش وهل الجيش عاوز يحكم تانى ويطلع حد يهتف ضده وهل المعارضه تقبل بحكم الجيش وهل الإخوان يقبلوا ويسكتوا وهل أنصارهم من التيارات الإسلامية تحمل السلاح ويحطوا السيخ المحمى فى ودن أى حد عاوز يخلع مرسي وهل تتحمل البلد مزيدا من الفوضى؟
صحيح إن نظرية الفوضى الخلاقة نظرية أمريكية خالصة اخترعتها الست كوندا ليزا رايس ولكن خلاص الفوضى عملت اللى عليها واللى عاوزاه ماما أمريكا بتعمله، وزمان قال مبارك ردا على سؤال كان بيكرهه جدا هو ليه مفيش نائب رئيس لحد دلوقت قال مبارك خلوا أمريكا تعين لكم واحد، وقال مبارك أمريكا كانت عاوزة تخلعنى منذ 2005 ولكن قبل هذا التاريخ كانت بتعتبره أحسن واحد يحكم مصر لأنه فى نظرهم رئيس رصين ورزين ويتمتع بالرصانه التى تصل إلى حد البلادة والبرود الشديد فى التعامل مع إسرائيل بصفة خاصة ومع المعارضة وخصوصا مع الذين كانوا يدعون إلى إلغاء كامب ديفيد وتحرير القدس ويدعون إلى الكفاح المسلح والى الجهاد.
وكلنا نذكر الزعيم الكتاتنى رئيس حزب الحرية والعدالة الآن وكان رئيس الكتلة البرلمانية للاخوان فى مجلس الشعب من 2005 الى 2010 عندما قال افتحوا لنا باب الجهاد نحرر القدس ورد مبارك فى خطاب شهير ببرود ورصانة فائقة اتفضل ياسيدى روح جاهد وحرر القدس هو حد ماسكك.
كل هذه حقائق يعرفها كل مواطن فى مصر ولا تحدثنى عن استقلال القرار المصري وان الشعب يصنع مصيره بإيده، وكل هذه الشعارات انتهت فأمريكا لا تستحى ان تعلن أنها من يتحكم ومن يسند والإخوان يتجاهلون الشعب والمعارضة وعينهم فقط على أمريكا التي وعدتهم بالمساندة والدعم المستمر وهم كانوا مطمئنين لأن المندوب السامى الأمريكانى راض ووعدهم بحل المشكلة مع صندوق النقد الدولى بالنسبة للقرض وسوف يأمر قطر فتضع الوديعة لدى البنك المركزى المصري صحيح انها بأعلى فائدة فى العالم وهى 4% تقريبا بس مش مهم فقطر لن تطالبنا بالفائدة ولا بأصل الوديعة إلا إذا تغير النظام الحاكم وهو فى رأيهم لن يتغير على الأقل فى المدى القريب طالما ان المندوب السامى عاوز كده أو كما يقول جمهور السيما الترسو المخرج عاوز كده.
ولذلك يهرول الإخوان الآن الى القبلة الأمريكية يعرضون مزيدا من الرصانة والتعاون ويؤكدون للجانب الأمريكى انه لا يوجد أحد غيرهم يمكن أن يحكم وينفذ لهم سياسة الرصين، كما أنهم يستغيثون الآن بالأمريكان كى يضغطوا على الجيش ألا يقف إلى جانب الشعب الثائر يوم 30 يونيو ولكن اذا الشعب يوما أراد الحياة فلا بد ان تستجيب ماما أمريكا وتطلق الإخوان فورا.
فكرة للتأمل:
مثل مصري قديم جدا يقول اللى طلع البغل المدنة هو بس اللى يقدر ينزله