بوروروم

بالرغم من ان جميع العساكر فى الصف قبل العسكرى رجب قالوا ان شغلتهم عل المدفع بوروروم، الا ان الشاويش عطية قفش رجب وفضحه وقاله بوروروم شغلتك على المدفع بوروروم ليه لان رجب هو البطل هو الفنان الكبير اسماعيل ياسين ولازم الإفيه يكون معاه والواقع ان حال مصر كها الان بوروروم فلا احد يعرف اى حاجة واذا سألت اى واحد صاحبك الناس اللى بتحكم دول كلهم شغلتهم ايه وبيعملوا ايه لازم يقول لك بوروروم فالاخوان يعتبرون ان الحكم غنيمة وانهم يستحقون هذه الغنيمة لانهم صبروا وثابروا واعتقلوا واتبهدلوا وهربوا من السجون وقبلها اتمنعوا من الوظائف الكبيرة ومن دخول ولادهم كليات البوليس والجيش وطبعا النيابة والقضاء.
مش مهم كل ده المهم انهم وصلوا وبيحكموا بس هم بيحكموا جماعة علشان ياخدوا ثواب الجماعة ولان المركب اللى فيها ريسين تغرق فمركب الوطن غرقانه وقربت توصل القاع لان فيها 100 ريس وكلهم مش عارفين يشغلوها إزاى ورافضين أي حد يشاركهم او حتى يشور عليهم لان الغنيمة لهم لوحدهم وبالتالى كل واحد منهم ماسك بإديه وسنانه والتهديدات شغالة لو حد قرب لنا او حاول يشاركنا حنخرج عليه بالسلاح.
طيب ياجماعة لو بس الناس تحس ان فيه حاجة صح اتعملت كلنا نقف ونصفق لكم.
وزمان قالوا فى الأمثال إيه غرض الأعمى قال قفة عيون يعنى الشعب الجعان العاطل الفقير عايز يشوف أى كرامة أى تحسن فى اى حاجة.
والغريب فى الأمر أن الشعب كله عارف إن الرئيس مرسي ليس وحده يحكم والدليل ان الناس اللى مع مرسي بتهتف تقول يابديع يابديع انت تأمر واحنا نطيع. والناس اللى ضد مرسى يهتفون يسقط يسقط حكم المرشد طيب فين مرسي الرئيس من كل هذا هو طبعا المسئول عن كل شئ لانه على الورق هو الرئيس ولازم يقول للشعب شغلة الناس اللى معاه إيه.. وأكيد مش بوروروم فمثلا الشعب كله عاوز يعرف موقف الرئيس والناس اللى معاه من القضية.
الفلسطينية ومنع الأذان فى القدس وفين شعار على القدس رايحين شهداء بالملايين وليه مفيش اي بيان حتى استنكار ولا شجب ولا إدانة رغم ما تعرض له دبلوماسيون مصريون فى اسرائيل وليه الاخوان عملوا مظاهرة متواضعة جدا لنصرة القدس وهل معقول ان حد بيحكم يعمل مظاهرة ضد نفسه. طيب ايام مبارك كنتم بتعملوا مظاهرات وافتحوا لنا باب الجهاد. ايه اللى مانعكم؟ الاجابة على كل هذه الاسئلة بوروروم. طيب مين جاب بجاتو وزير وليه بعد كل العداوة وايه موقف الرئاسة بالضبط من مقتل جنودنا ال17 وخطف ال 7 وهو مين مع مين ضد مين؟ الاجابة ايضا بوروروم.
والحقيقة انه لا أحد يعرف أحد ولا تثق أبداً فى أحد وانت لا تعرف مين اخوان ومين مش إخوان ..ولا مين بيخدم على مين وفين الدولة مفيش غير إجابة واحدة بوروروم. على فكرة الرئيس مرسي دايما بيقول انا القائد الاعلى للقوات المسلحة طيب ده شُغلته إيه وعلى فكرة كمان الرئيس مرسي رقم أربعة.
مثل مصري قديم جدا قالوا الجمل طلع النخلة ادى الجمل وادى النخلة.