سامح حسين فواعلي بدرجة ليسانس حقوق ويرفض فلانتينو الزعيم ويكشف أسرار المهنة (شاهد)

كشف الفنان ونجم الكوميديا سامح حسين عن الكثير من الأحداث والأسرار والكواليس التي حدثت بحياته العائلية والمهنية، وذلك من خلال حديثه في إحدي البرامج التلفزيونية.
ظهر سامح مع الإعلامي عمرو الليثي في برنامج "واحد من الناس" المذاع علي قناة "الحياة" وتحدث عن أمور كثيرة، تخص حياته بشكل عام قائلًا: "عشنا فترة صعبة جدا لكن كان عندنا عزة نفس، أنا عندي ألم في فقرات الظهر السفلية من أيام دراستي في الجامعة، بدأت أشتغل من صغري لإني كنت محتاج فلوس جنب الدراسة، أنا بحترم جدًّا كل اللي بيشتغل وبيصرف على أهله".
اقرأ أيضًا..سامح حسين يحتفل بعيد ميلاد ابنته (صورة)
تفاصيل حديث سامح حسين عن حياته:
أضاف نجم الكوميدي: "اشتغلت فواعلي أشيل طوب ورمل وأطلع عمارات، والدتي قعدت في المستشفيات 6 شهور، وأنا ساعتها كنت قليل الحيلة، ومكانش معايا فلوس أجيب لها كيس دم، وإما أتبرع أو أطلب من أصحابي، وفي آخر أيامها عرفت من الدكتور إن وفاتها هتكون خلال أسبوعين، وفاة والدتي هزتني ووجعت قلبي، وتوفيت وهي عمرها 49 سنة بعد ما جالها السرطان، وفضلت 7 شهور بعد وفاتها أتمنى إني أموت".
تابع سامح قائلًا: "بعد وفاة والدتي توفي شقيقي أحمد وعمره 19 سنة تقريبًا، إخواتي أنا اللي مربيهم ومعلمهم وده بسبب الانفصال بين الوالد والوالدة، إخواتي أنا بعتبرهم أولادي، ووالدي ووالدتى كانوا منفصلين، كافحت مع والدتي علشان نربي أخواتي، واخد على خاطري من والدي، عشان كده دايما أقول لمن يفكر في الزواج لو مش قادر على مسئولية الزوجة والأولاد بلاش تتجوز، كانت زوجة والدي ووالدتي أصحاب جدًّا وكنا ساكنين في بيت واحد لدرجة إن زوجة والدي ما زالت لابسة أسود بعد وفاة والدتي من حبها لها،
وأنا بعتبرها زي أمي وهي دي الروح الجميلة اللي اتربينا عليها في حي شبرا".
علق قائلًا أيضًا: "أنا لا أخجل من أي شيء بالعكس كان ربنا بيطبطب عليا دايما، معايا ليسانس حقوق بناء على رغبة العائلة، لأن معظم العائلة محامين ووكلاء نيابة، التحقت بكلية الآداب قسم مسرح علشان أمارس هوايتي في التمثيل، أنا على علاقة قوية جدًّا مع أخواتي من والدي ووالدتهم، كنت شغال في النقاشة وكنا بنعمل عمارة من الخارج وكنت شغال في الدور ال17 متعلق على ثقالة، وبعدين اتحركت من مكانها كنت هموت، حصلي حوادث كتير، على طول بتكهرب لدرجة أن شعري أبيض من أيام الثانوية العامة.
مسلسل فلانتينو:
وضح سامح عن رفضه دور بمسلسل فلانتينو معلقًا: "أنا من عشاق الزعيم عادل إمام، وأكيد الشغل معاه إضافة لأي فنان، ولكن لما اتعرض عليا دور بمسلسل فلانتينو، الدور مجذبنيش كدور مهم أو مؤثر في الأحداث ورفضته، والمشكلة مكنتش في مساحة الدور اللي اتعرض عليا في المسلسل، لكن لأنه الزعيم لازم تحس إنك هتبقى مؤثر في العمل وأنا محستش ب ده، والفنان حمدي المرغني قدم الدور بشكل حلو جدًّا".