السياسة عايشها إزاى: (أخرس- أعمى- أطرش)؟!

"البلد دلوقتي بقت عامله زى واحد أخرس بيقول لواحد أطرش إن في واحد أعمي شاف واحد مشلول بيجري ورا واحد أقرع عشان يسرح له شعره!!.. نعيما يا حضرات".
لو فكرت شويه ممكن تلاقي نفسك واحد من دول بسبب الأحداث الأخيرة في مصر، فكل مكان تذهب إليه سياسة.. ففي البيت سياسة.. العمل سياسة.. المواصلات سياسة.. السوق سياسة.. وللكل "سياسته في التعبير عن سياسته"!
فعندما تبدأ يومك.. وفي المواصلات العامة.. سيخرج إليك سائق ميكروباص بلفظ جديد يعبر عن حالة الإحباط التي أصابت الجميع في الأيام السابقة، وها هو أحدهم يقول في نقاش بينه وبين أحد الركاب: "إحنا طرشانين يأس!".
تنزل من المواصلات وتذهب إلى عملك، ومن أول "عم عبده" الساعي لحد جناب المدير العام لا تسمع ولا ترى إلا أحاديث السياسية بين الزملاء.. (مرسي كويس.. لا لا مرسي وحش.. الإعلان الدستوري ميه ميه.. الإعلان الدستوري يععع).. والاختلاف يتحول إلى مشادات كلامية لا تنتهي إلى شئ.. ولا العمل يتم ولا الأحاديث تنتهي.. والنتيجة: "فوت علينا بكره الإحباط مستمر".
تنتهي من العمل، وعايز تخرج من مود السياسة ونويت التسوق، وأثناء إتخاذ قرار بشراء أي نوع من البضائع.. تجد سؤال واحد يتكرر من الزبائن لماذا الأسعار عالية، فيرد البائع: "الاسعار مجنونة.. وخلاص فلسونا.. والبلد حالها واقف.. أدي اللي خدناه من السياسة وبتوع المظاهرات".
تقرر الذهاب إلى مطعم لتتناول "أي حاجة" تسد بها جوعك.. ستجد التليفزيون لا ينقل إلا السياسة.. ومن يجاورونك في الترابيزة لا يحلو لهم تناول الطعام إلا بإضافة كاتشب "السياسة"، ومايونيز "الإخوان"، ومسترضى "المعارضة"!!.
وأنت مروح ستجد مقاهي "المنطقة" وعربات "التوك توك" ينطلق منها: "البلد خربانة.. يا عم خربانة".
تعود إلى المنزل يقابلك عبد السميع البواب يسألك: "وبعدين في البلد اللى نايمة دي يا أستاذ هي هتصحى إمتى؟".. وقبل أن تتنحنح يرد على نفسه: "خلاص البلد في غيبوبة.. إدعي لها حضرتك"، ووما أن تعطيه ظهرك لتصعد تسمع زوجته تسأله: "يعني إيه يا عبد السميع مش هنلاقي ناكل بعد كده؟.. الناس هتاكل في بعضها ولا إيه؟".
ما إن تدخل المفتاح ف الكالون وتفتح باب الشقة ستجد (الحاج / الحاجة / المدام) يسألك السؤال المعتاد: "ها إيه اللي حصل في البلد النهارده؟".. وسواء جاوبت أو مطيت شفايفك حيكون الرد: "ربنا يسترها ع البلد".
تجلس على "الفيس بوك" لترى الأحوال ما يحدث من حولك فتجد بوستات وتعليقات كلها سياسة × سياسة.. واحد بيهاجم مرسي، وواحد بيدافع عن الإخوان، وواحد بيتمنظر "مش قولتلكوا من وزمان..."، وواحد مقضيها أفيشات من وحي السياسة..
تحب تفهم إيه أخر الأخبار تلاقي حد كاتب: "أنا مبقتش فاهم أي حاجة.. ياريت اللي فاهم يفهمني "، واللي فاهم يطلع يرد على اللي مش فاهم ويقوله: "مش محتاجه مفهومية دى بتتفهم وهي طايرة".
تفكر مغادرة الفيس والبيت وتخرج تشم هوا.. هتلاقي اللي كاتب بوست يقول: "إلبس يا شعب ..علشان خارجين"!!.