الأقوال المستباحة في النقد والصراحة

* إلي الرئيس الإسرائيلي السابق موشيه قصاب
إزاي توافق ان يحاكموك
علي اغتصاب العرض..!!
ولا يحكموش اسرائيل علي
اغتصاب الأرض..!! ازاي »ندالة«..!!
* إلي مجلس الأمن
آخر التقاليع الدولية
ناس تضرب بالطيران والمدفعية
وناس تدفع الفاتورة الحربية »بلطجة«..!!
* إلي الأغنية المصرية
المذكورة عالية
توفيت من زمان. بعد رحيل عباقرة
الغناء والألحان. لا أراكم الله
مكروها في غناء لديكم ولا عزاء
للمطربين الشبان »الفاتحة«
* إلي مجلس القضاء الاعلي
مسلسل التحقيق والتحري والتدقيق
والعدل البطيء بيفقع المرارة
ويهرب المذنب ويموت البريء..!! »صراحة«!!
* إلي الدكتور يحيي الجمل نائب رئيس الوزراء
أم سمارة بتسأل الحاج عمارة
هما صحيح قاطعين الحرارة
عن الوزارة؟ »يمكن«
* إلي المخرج الكبير جلال الشرقاوي
علي رأي الواد سيد العسال
سبحان مغير الاحوال
المسارح كلها مقفولة
ومسرح الفن شغال..! »دنيا«
* إلي الرئيس السوري بشار الأسد
يا بشار الأسد الطامع
شايف طبعا واكيد سامع
القذافي بيدبح ليبيا..!!
وانت جنودك قفلوا الشارع
قتلوا الشعب السوري في الجامع..!! »فضايح«..!!
* إلي الكابتن حسن شحاتة المدير الفني للفريق القومي
الفريق اللي من غير هداف
ينام ويشد اللحاف..!! »والبطانية«
* إلي يوسف بطرس غالي
حتروح فين يا مسئول
ياللي رفعت سعر الفول
وكنت حتبيع أبو الهول
لو انت في بطن الغول
حيجيبك الانتر.. بول..! »متحولش«
* إلي الاعلامي حمدي الكنيسي ولجنة المصالحة الإعلامية
مقترحاتكم مسموعة
والمصالحة مشروعة
وماسبيروا مرارته مفقوعه..!!
وأي كلام من غير وزير اعلام
تبقوا بتنفخوا في قربة مقطوعة »صراحة«..!!
* إلي علي عبدالله صالح رئيس اليمن
علي رأي واحد من هناك..
شايفك من الشباك..
انقذ الشعب اليمني من الهلاك..!!
وان كنت طمعان في الكرسي
خذ الكرسي والطربيزة كمان معاك »ومع السلامة«..!!
* إلي الدكتور سامي عبدالعزيز عميد كلية الاعلام
علي رأي عبدالله المصري الغلبان
كل من عليها فان
والمتغطي بالحزب الوطني عريان..»دنيا«..!
* إلي الدكتور محمد رجب أمين عام الحزب الوطني
لو عايز تعمل حزب زي زمان..
قول للزمان ارجع يا زمان..
وهات لي حزب لا فيه تزوير..
ولا فيه فلان ولا فيه علان.. و»ابقي قابلني«..!!
* إلي مبني ماسبيرو
المشكلة محتاجة
رئيس اتحاد خواجة
كوتش برتغالي
يخلص لك كل حاجة ..»جرب«
* إلي الكابتن سمير زاهر رئيس اتحاد الكورة
اللي راجعين مهزومين
من عند نيلسون مانديلا
المفروض تكسر وراهم حد اشر »قله«.
ويروحوا معاك اتحاد الكورة
يسلموا الشورت والفانلة..!! »وبس«