هاجم محمود عبد الرحيم "جنش"، حارس مرمى نادي الزمالك، إدارة ناديه بسبب عدم حصوله على مقدم عقده حتى اللحظة الحالية، متسائلًا أن كان سبب ذلك، إصابته، هو ما جعل الإدارة تتجاهل طلبه أم شئ آخر، قبل أن يرد عليه أمير مرتضى منصور المشرف على الكرة بالنادي أن الأمر نفسه يحدث مع باقي لاعبي الفريق بإستثناء لاعبين لظروف طارئة لديهم، وأن الأمر مسألة وقت لا أكثر. كتب محمود جنش على حسابه عبر موقع التواصل الإجتماعي "انستجرام": "عن أَبِي هُرَيْرَةَ عَنِ النَّبِيِّ صَلَّى اللهُ عَلَيْهِ وَآله وسَلَّمَ قَالَ: «لَا يَشْكُرُ اللهَ مَنْ لَا يَشْكُرُ النَّاسَ» رواه أبوداود في "سننه". وانا أتقدم بخالص الشكر والتقدير الى الاتحاد المصرى لكره القدم على تحمل كافة تكاليف علاجي حتى الان واشكر جمهور نادى الزمالك العظيم على مشاعركم الجميله ومساعدتى في تخطى الازمه والعوده سريعا الى الملعب فدمتم لى خير اخوه وأؤكد انى لم احصل على مقدم تعاقدي من نادى الزمالك حتى الان ولا اعرف السبب هل هو بسبب اصابتى؟ او بسبب شى اخر". ليرد عليه أمير مرتضى منصور المشرف على الكرة بنادى الزمالك عليه قائلًا: " احب ارد عليك قدام الناس علشان حقك و حقهم يعرفوا لأنك سألتني قبل كدة ورديت عليك بيني و بينك لما جيتلك البيت ورغم ان نظام الفريق منع الكلام في الاعلام و السوشيال ميديا بس هرد عليك، لا السبب مش اصابتك طبعاً يا كابتن .. تقدر تسأل كل زمايلك في الفريق على مقدم الموسم الجديد حصلوا عليه ولا لأ !! جميع اللاعيبن بإستثناء اتنين لاعيبة فقط هما اللي حصلو على المقدم علشان كان عندهم ظروف طارئة يعني مثلاً فرجاني و بو طيب طارق حامد و محمود علاء و الونش و محمد حسن زيزو وعمر السعيد و عبدالله جمعة واوباما و غيرهم لسة مخدوش مقدم الموسم الجديد .. اما بالنسبة للاعيبة الجديدة(الصفقات ) فالطبيعي ان يقبض المقدم مع التوقيع وفي برضه ناس لسة مقبضتش وقالو مفيش مشكلة نقبض مع زمايلنا بما انك سألت عن السبب قدام الناس فأحب اقولك ان الشركة الراعية متأخرة في دفع مستحقات كل الاندية حتى المقاصة كانت مش هتذيع الماتش بسبب مستحقاتهم تقدر برضه تسأل زمايلك في اندية تانية بإستثناء بيراميدز". وأضاف: "عقود الرعاية و البث التلفزيوني هي 90٪ من موارد النادي .. كان ممكن نبيع طارق حامد او محمود علاء او فرجاني و ندخل فلوس كتير النادي و ساعتها مكانش هيكون في ازمة سيولة بس ده كان ضد مصلحة الفريق .. كان ممكن منشتريش عواد وابو جبل و اوناجم وبن شرقي بالمبالغ دي و نجيب بدايل ارخص و نوفر برضه فلوس .. بالإضافة لمديونيات اكتر من 5 مليون دولار على الزمالك اتدفعوا كلهم السنة دي ومشاكل مع الفيفا عقوبتها خصم نقاط و وقف شراء و بيع لاعيبة لمدة 3 مواسم في حالة عدم السداد و اخرها كان من يومين عالعموم انت من كباتن الفريق و المفترض انك تستحمل زي ما زمايلك مستحملين ايه المشكلة فلوس تتأخر كام يوم!! زي ما الموسم اللي فات كنتوا بتاخدوا 4 و 5 اضعاف المكافأت ...بتمنالك الشفاء". قبل أن يرد عليه جنش قائلًا: "وانا برضه هرد علي حضرتك ان انا برضه عندي ظروف و كلمتك كتير و خليت وكيلي يكلمك و كلمت ك زاهر وجيت النادي و حضرتك خلتني قاعد 6 ساعات عشان 200000 الف جنيه". وتابع: " في الآخر حضرتك كلمت وكيلي قولتله أدي جنش 150000 الف من معاك وعلي العلم برده انا عقدي مش كبير زي أغلب الاعبين اللي حضرتك زكرتهم و بعدين سؤال بس هو في حد استحمل النادي اكتر مني ودا مش كلامي دا كان كلام حضرتك صح برده والا ايه اه حاجه تانيه المفروض لما اتصاب يكون ناديه اكتر حد داعم ليا وجانبي مش كدا والا ايه".