أمير مرتضى يوضح ل"جنش" سبب تأخر صرف مقدم عقده

رد أمير مرتضى منصور، المشرف على الكرة بنادي الزمالك، على استفسار محمود جنش، حارس الفريق، والخاص بتأخر النادي في منحه مقدم تعاقده عن الموسم الجديد، دون أسباب واضحة؛ متسائلاً: هل التأخير نتيجة إصابته؟.
وعلق "أمير"، على استفسار "جنش"، الذي نشره على حسابه الشخصي، بموقع التواصل الاجتماعي "إنستجرام"، قائلاً: أحب أرد عليك قدام الناس، علشان حقك وحقهم يعرفوا، لأنك سألتني قبل كدة، ورديت عليك بيني وبينك، لما جيتلك البيت، ورغم أن نظام الفريق منع الكلام في الإعلام والسوشيال ميديا، بس هرد عليك.
وأضاف المشرف على الكرة بالزمالك: لا السبب مش إصابتك، طبعاً يا كابتن، تقدر تسأل كل زمايلك في الفريق، على مقدم الموسم الجديد، حصلوا عليه ولا لأ!.. جميع اللاعبين باستثناء اثنين لاعيبة فقط، هما اللي حصلوا على المقدم، علشان كان عندهم ظروف طارئة، يعني مثلاً: فرجاني وبو طيب طارق حامد ومحمود علاء والونش ومحمد حسن وزيزو وعمر السعيد وعبدالله جمعة وأوباما، وغيرهم لسه مخدوش مقدم الموسم الجديد.
وتابع: "أما بالنسبة للاعيبة الجديدة (الصفقات) فالطبيعي أن يقبض المقدم مع التوقيع، وفي برضه ناس لسة مقبضتش، وقالو مفيش مشكلة، نقبض مع زمايلنا، بما أنك سألت عن السبب قدام الناس، فأحب اقولك إن الشركة الراعية متأخرة في دفع مستحقات كل الأندية، حتى المقاصة، كانت مش هتذيع الماتش، بسبب مستحقاتهم، تقدر برضه تسأل زمايلك في أندية تانية باستثناء بيراميدز.
واستطرد "أمير" قائلاً: عقود الرعاية والبث التلفزيوني، هي 90%، من موارد النادي.. كان ممكن نبيع طارق حامد أو محمود علاء أو فرجاني، وندخل فلوس كتير، والنادي ساعتها مكانش هيكون في أزمة سيولة، بس ده كان ضد مصلحة الفريق.. كان ممكن منشتريش عواد وأبو جبل وأوناجم وبن شرقي، بالمبالغ دي، ونجيب بدايل أرخص ونوفر برضه فلوس.
وقال: "وبالإضافة لمديونيات أكتر من 5 مليون دولار، على الزمالك، اتدفعوا كلهم السنة دي، ومشاكل مع "فيفا"، عقوبتها خصم نقاط، ووقف شراء وبيع لاعيبة، لمدة 3 مواسم، في حالة عدم السداد، وآخرها كان من يومين، على العموم أنت من كباتن الفريق، والمفترض أنك تستحمل زي ما زمايلك مستحملين إيه، المشكلة فلوس تتأخر كام يوم!!، زي ما الموسم اللي فات كنتوا بتاخدوا 4 و5 أضعاف المكافآت... بتمنالك الشفاء".