بلال فضل يطالب بتشكيل حكومة ظل

استنكر الكاتب الصحفى بلال فضل عدم مبادرة الرئيس محمد مرسى لحل أزمة دهشور، مؤكداً أن صلاته للجمعة أمس فى دهشور بدلا من الأقصر كانت ستعنى الكثير للناس.
قال فضل فى تغريدة له على "تويتر" أمس الجمعة: "كنت أتمنى إن صلاة الجمعة يؤديها مرسي في دهشور مش في الأقصر ويشوف المشكلة بنفسه وهو فاتح قميصه للرصاص بدل مايعتمد على تقارير الأمن الفكسانة".
وأضاف: "قلتها من قبل وأكرر: الرئيس سيصنع هيبته بالمبادرات الذكية السريعة، مجرد وجوده بين الناس في أزمة زي دى كان سيعني الكثير لكن هيشتري الخيال منين؟، عايز تلعب سياسة مع العسكري وتضرب وتلاقي ماشي، بس كمان على المستوى الشعبي خليك حسيس ومبادر وإضرب المثل في إدراك خطورة الفتنة الطائفية".
وشدد فضل على أهمية تشكيل حكومة ظل للضغط على الحكومة قائلاً: "مافيش ولاحد حتى من باب إحراج مرسي أعلن تشكيل حكومة ظل كلها كفاءات عشان يقول للناس إحنا بنمتلك البديل، الشارع بعد الثورة ينفع أداة ضغط لكن لو بقى الإحتكام فقط للشارع بدل الصندوق هيبقى الحكم العسكري المباشر هو الحل، وده اللي بيحرب عليه البعض".
ووجه فضل رسالة للإخوان المسلمين قائلاً: "عزيزي فرد الإخوان دعمك لمرسى هيكون أفيد بإنك توصل له سخط الناس وغضبهم مش بإنك تشتغل مبرراتي، لإنها لما تخرب هتخرب على الكل مش هتخص ناس بعينهم، يخطئ الإخوان ومعارضوهم لو ظنوا إن الثورة الجاية هتقوم أو هتتمنع بناء على رغبات حد، ونخطئ جميعا لو افتكرنا إن تكلفتها هتبقى هينة".
وطالب بلال فضل بوجود معارضة قوية منظمة ضد مرسى وحكومته بدلاً من سيطرة الدولة الغويطة على المعارضة قائلاً: "ندرك جميعا أن الصراع مع الدولة الغويطة ليس سهلا ومن كل قلبي أتمنى التوفيق لمرسي مهما كنت أعارضه لكن هناك فرق بين دهاء معوية وبرود مبارك، كلنا في مركب واحد والحل هو معارضة قوية ومنظمة تتحرك في الشارع لأن البديل ليس آمنا لنا جميعا والله أعلم".