انتشرت فى الأيام الأخيرة على موقع تويتر هاشتاج #عايزين_تكليف_تربية، وهو هاشتاج أطلقه طلاب كلية التربية مطالبين بعودة تكليف المعلمين وإلغاء الدبلومة التربوية ، وزيادة مرتبات المعلمين ، حيث يواجه الطلاب ككونهم معلمي المستقبل الكثير من المشكلات التي جاءت على لسانهم والتي تتمثل فى ضعف المرتبات، عدم وجود فرص عمل، استغلال المعلم من قبل المدارس الخاصة، وعدم وجود امتحانات قدرات تؤهل لاختيارالمعلم الكفء. ومن جانبه قال مصطفى الغنيمى، طالب بالفرقة الرابعة كلية التربية جامعة عين شمس، "أي حد دلوقتي يقدر يعمل الدبلومة التربوية ويبقى مدرس وخريجين تربية قاعدين من غير شغل وبيتساوا بينا وده بيعمل زيادة بشكل كبير فى عدد المدرسين وبالتالي مش هيبقى فيه شغل، مستكملاً "إحنا شايفين الدبلومات التربوية عملية تجارية وده بيخلينا تحت رحمة المدارس الخاصة الي بتتحكم فينا بشكل بشع بمرتباتهم القليلة جداً الي متكفيش حد". وأضاف مطالباً "لازم يلغوا الدبلومة التربوية وده أول مطلب لأنه السبيل الوحيد عشان التكليف يرجع وده لأن أعداد المدرسين بيتضاعف فوق عدد خريجي التربية فبيحصل ضغط كبير جدا على الحكومة وبالتالي مبيبقاش فى تكليف ولازم التكليف يرجع لخريجي تربية وده لتغطية العجز الموجود بجميع المدارس بالادارات التعليمية بما فيهم الي لسة هتتبني، وكمان بطالب بزيادة مرتبات المدرسين. واوضح "والدتى مدرسة لغة عربية و بقالها 28 سنة فى التربية والتعليم وبتقبض 2540جنيه بس ". وأضاف محمد حسن، أخ أكبر أسرة شباب مصر كلية تربية عين شمس ورئيس اللجنة الإعلامية باتحاد تربية مصر سابقا، "أنا كواحد كنت طالب فى تربية ليه أخرج ملاقيش شغل وإحنا بندخلها من 91 أو 92% والمفروض إنها كلية قمة ونتساوى بأي طالب تاني ملهوش فى مجال التدريس وبمجرد أنه يعمل الدبلومة هيبقى منافس ليا فى فرص العمل". وفى تصريح خاص ل"بوابة الوفد"، أوضح الدكتور عبد الرحمن البكري، عضو لجنة التعليم بمجلس النواب، أن إعادة التكليف من أسباب رفعة التعليم فى مصر فإن أردنا جودة العملية التعليمية لابد أن يعود التكليف لطلبة كلية التربية لترجع لكلية التربية ريادتها كما كانت من قبل. وأشار إلى أنه مؤيد لمطلب الطلاب بعودة التكليف، مضيفاً أنه ضد إلغاء الدبلومة التربوية لأن التعيين حق لكل من كليتي تربية وآداب. وتابع: "أُدعم مطلب زيادة مرتبات المعلمين لأن المعلم لابد أن يكون له راتب يكفيه".
