شباك على الثورة

إنت مكسوف طبعاً

الواد ميشو ابنى يستعد هذه الأيام بهمة ونشاط لأن عيد ميلاد وحيده يوسف على الأبواب كل سنة وهو طيب ومصر طيبة يارب.. سألنى
تحب نعمل عيد ميلاد يوسف فين؟
قلته له
أنا إن كان على عايز اعمله فى ميدان التحرير
ضحك وقال
مش قوى كده يا عم أحمد
فقال شوقى محمود إسماعيل جاد هو ابنى أيضا
ليه مش قوى كده يا ميشو
فقال ميشو
مش لدرجة ميدان التحرير يابوأحمد
قلت
بل هو ميدان التحرير بالذات واللى مش عاجبه مطرح ما يحط راسه يحط رجليه
فقال ميشو
طب ليه وإيه الثقة دى كلها
قلت
ميدان التحرير كان مجرد مكان من عشرات الأماكن قبل أن يعلنوا منه ثورتهم المجيدة ثورة 25 يناير سنة 2011 المنتصرة بإذن الله
فقال شوقى - أبوأحمد - ضاحكا
فهمت؟ ولا أجيب لك يوسف يفهمك
فقال ميشو
تصدق صحيح إن العيال دى هى اللى بتعلمنا؟
قلت
وأنت مكسوف طبعا؟
قال
ايوه مكسوف يا عم أحمد المفروض إن احنا اللى نعلم عيالنا
فقال شوقى
ونتعلم منهم برضه
فنظر ميشو نحوى متسائلا
وهو دا بقى يا عم أحمد الزمن اللى وصى عليه حسان اليماني
قلت على الفور
مضبوط هو دا الزمن اللى وصى عليه حسان اليماني
فقال أبوأحمد
هو حسان اليمانى ده كان شغال إيه؟
قلت
بيقولوا كان شغال فى القرنص
فقال شوقي
وإيه علاقة القرنص بالزمن اللى وصى عليه؟
وتساءل ميشو
على فكرة أنا سمعت كتير كلمة القرنص لكن لحد وقتنا هذا ما فهمتش يعنى ايه القرنص
قلت مجموعة من المصريين ضاقت بهم السبل فى مصر المحروسة فلجأوا إلى معسكر جيش الاحتلال الإنجليزى فى منطقة قناة السويس
وتساءل ميشو
راحوا يتسولوا
قلت
فشر قطع لسان اللى يقول كده دول راحوا يشتغلوا ويكسبوا رزقهم ورزق عيالهم بعرق جبينهم
وقال ميشو
أنت مش ملاحظ يا عم أحمد أن الشعب المصرى اللى أنت خاوتنا بيه بيشتغل من المهد إلى اللحد؟
قلت
وهذه هى عظمة الشعب المصرى ومصدر قوته وسر استمراره.. العمل العمل العمل فهمت يا ميشو؟