نشطاء: "ادى صوتك للفلول وأنت لوحدك المسئول"

وزعت صفحة "صوتك للفلول" على موقع التواصل الاجتماعي "فيس بوك"، منشورات ضد مرشحي الفلول بالانتخابات الرئاسية أمس السبت في مسجد أسد بن الفرات بالدقي، كما أعلنوا استكمال مسيرتهم ضد الفلول – كما وصفوها - اليوم الأحد أمام محطة مترو أنفاق سراي القبة.
وعن شعارهم، قال القائمون على الصفحة: "شرف السياسي زي عود الكبريت، لو اتحرق عمره ما يولع تاني، عشان كده شعارنا مرشحي الفلول أعواد محترقة، ولو نفسك ترجع النظام القديم تاني انتخبهم وضيع دم اللي ماتوا هدر".
وأضافوا: "لو علم الشهداء أنكم ستعطون أصواتكم لنفس النظام القديم الذي قتلهم في الميادين ما كانوا منحوكم بدمائهم حق التصويت من البداية".
وسخر أدمن الصفحة التي يبلغ عدد أعضائها أكثر من 5,800 شخص قائلاً: "مرة واحد قبل الثورة قال إن مشكلة مبارك في الناس اللي حواليه، وبعد الثورة إنتخب الناس اللي حواليه".
وتضمنت الورقة التي تعكف الصفحة على توزيعها على الناس بالشوارع والمساجد والكنائس، مايلى :
• نفسك ترجع النظام القديم ؟!
• نفسك ترجع قانون الطوارئ وابنك يتاخد تحرى لمجرد انه ماشى فى الشارع متأخر ؟!
• نفسك يفضل الدرج يتفتحلك فى كل مصلحة حكومية عشان تحط فيه الرشوة للموظف عشان يمشى مصلحتك؟!
• نفسك ترجع الإهانة و الضرب و التعذيب فى أقسام الشرطة ؟!
• نفسك خيرك و خير بلدك يبقى مش ليك و ترجع بلدك تتنهب تانى
• نفسك تانى أكلك و محاصيل بلدك تبقى مسرطنة و ماء شربك يجيب فشل كلوى ؟!
• نفسك تانى الناس تموت فى طابور عيش أو فى عبارة غرقانة أو فى قطر محروق ؟!
• نفسك تفضل جامعات مصر و تعليمها فى آخر قائمة الجامعات المحترمة فى العالم ؟!
• نفسك تانى يضيق عليك فى رزقك و يحبط ولادك و ينكسر الأمل فى قلوبهم و يبقى كل همهم يهربوا برة بلدهم اللى ما عدتش سايعاهم ؟!
• "نفسك ولادك يتفرجوا على اعلانات بورتو مارينا والرحاب ومدينتي ويشوفوا ولاد الناس بيلعبوا وبيتفسحوا فيطلبوا منك توديهم هناك فتقول لهم الحاجات دي مش لينا يا حبايبى"
• "نفسك تشوف بنتك قاعدة جنبك لحد ما قربت تعنس ومضطر تأجل جوازها بالزوج الصالح عشان مش معاك تجهزها ولو بأقل شيء ي إما تضطر تقبل أى حد و السلام عشان تسترها ؟"!
• "نفسك تانى تفارق ابنك ويتغرب بره سنين طويلة و يبقى كل أملك تشوفه و لو مرة قبل قضاء الله ما ييجى لأنه ببساطة مش هيعرف يعيش مستور لو رجع بلده؟!"
• "نفسك تشوف اخوك الصغير او ابنك على القهوة يدخن في سجاير وشيشة ومخدرات عشان ينسى ان عمره 35 سنة ومش عارف يشتغل او يتجوز او يلاقي شقة؟!"
• "نفسك تروح محكمة و متعرفش تجيب حقك غير بعد عشرين سنة ؟؟"
• "نفسك نفضل من اقل الدول فى معدلات الشفافية و من اعلى الدول فى معدلات البطالة؟؟"
• "نفسك تانى كل حاجة فى بلدك تبقى بالواسطة و لا تعرف تشتغل أو تتعين إلا بالكوسة و المحسوبية ؟!""
• "نفسك تانى صوتك ما يبقاش ليه قيمة و إرادتك تتزور و تبقى عايش فى بلدك كأنك غريب بل كأنك ما فيش ؟!
• "نفسك يبقى صفوة المجتمع و المبرزين و المتمتعين بخير بلدك الراقصين و الراقصات و الفنانين و الفنانات و فى نفس الوقت العلماء و النابغين فى كل مجال مدفونين بالحياة جوة بلدهم و مستقرين فى آخر الصف ؟؟
• "نفسك تشوف بلدك بتكسب كاس الام الافريقية ثلاث أربع مرات وبتخسر جنودها على الحدود ببلاش وبتركع لأعدائها وتبيع لهم خيراتها و خير أرضها بأبخس الأثمان ؟؟!
• "نفسك تانى تبقى إرادة بلدك دايما تابعة لأمريكا و إسرائيل و بعد ما كانت دولة علمت الدنيا الحضارة تفضل دولة فى ذيل الأمم ؟!
• "نفسك كل اللى ماتوا و اتصابوا عشان تعيش أنت وولادك و أحفادك بكرامة دمهم يروح هدر و تجيب نفس الناس اللى ثاروا على فسادهم؟!
• "نفسك ترجع تعيش بمذلة و تكون جوة بلدك مواطن درجة تانية ؟!
• "نفسك فى كل اللى فات ده ؟
• اشتقت له أوى ؟؟
• الحل سهل
• إدى صوتك لرجالة مبارك
• ادى صوتك لتلاميذه
• ادى صوتك للى اتربوا فى مدرسته و اتعلموا من طغيانه
• إدى صوتك للفلول بس بعدها أنا مش مسئول
• إنت لوحدك المسئول