جربت ...تتقشر زى البرتقانه دى....؟

بقلم احمد عبد الله
جربت...؟
جربت تنام اوى ف السقعه
وتحس ببرد بدون بطاطين
جربت تنام جوه ميدانك من غير تموين
جربت تكون واقف صامد والناس تتهمك بالتخوين
جربت تحس بانك روح مخنوق من ظلم البنى ادمين
جربت تموت
وتحس بناس ماتت قبلك جوه الملكوت
والناس فكراك انك ميت موجود ف تابوت
جربت تحس بشئ مكبوت
او تيجى تطلع يوم صوتك وتحس سكوت
جربت تعيش
وتحس بانك حبه هيش
وتحس بانك صوت وصريخ ...لكنو مفيش
جربت تكون الايقونه
حريه...كرامه...وحبه عيش
جربت تنام لحظه على الارض..؟بس على الخيش
جربت تكون
واحد مجنون..؟
بتنادى بحريه وطنك مطرح متكون
وبتفدى بروحك ف اخواتك من غير متخون
وبتاخد حقك م الواطى او راجل دون
جربت ف يوم تنسى ف عرضك
تنسى ف اهلك وتبيع ارضك
وتحس بانك يوم فرعون...؟
جربت تبيع
او بالامكان جربت تضيع
وتعيش تايه جوه ف بلدك وده يبقى فظيع
جربت تقاطع ف التطبيع
او تعلن يوم انك راجل وبدون تصنيع
جربت تقول وسعتها بجد نقولك زيع
جربت تكون
ويا الثوار ...؟
مستنى تخش ف وسطيهم وبقلب النار
جربت تكون...زى المختار
وبتهتف وتعلى ف صوتك ويكون موتك..؟
والعسكر ضاربين فوقك نار
جربت تكسر اى جدار
وتواجه خرطوش جه ف عينك ومعاك اصرار
جربت تعيش وبعين واحده وتواجه سيل مليان اخطار
جربت تكون ويا الاحرار
جربت ف يوم
تقفل ف النور وتعيش مع نفسك ف الضلمه
جربت تعيش مع ناس ظالمه!!!!؟
جربت تكمم يوم بقك..ولا تنطق وتقول ولا كلمه
جربت تجيب اعلى الشهادات...والاخر يكرمو ف العالمه.؟
جربت تشوف بنت اتعرت..غصبن عنها؟ويقولو كمان مش محترمه
جربت تحس انك راجل...؟مع ان الناس بتقول حرمه!!!؟
جربت ف يوم
تبنى الاخلاق ..مش تبنى عماره ورا عماره؟؟
جربت ف يوم هتكون ترياق وتكون للناس احلى اداره
جربت تعلم فى ولادك وولادك هيكونو مناره
جربت تكون عالم ف الكون وتعلم ف الشعب حضاره
جربت تعيش مفقوع عينك..طالع دينك..والمجرم يركب طياره
وتعيش محروم من ضى عنيك...الشكر لدكتورنا ...حراره
جربت تنام
مرتاح البال
موركشى لا هم ...ولا حتى عيال
وابقاق مفتوحه وعاوزه المم...ولا خال ولا عم ووقف الحال
وتقول طب زود ف مهيتى...يقولولك موت..وتكون بطال
وتروح بيتك تلقى الهم...وحرقه دم...وعيال على طول بتجيب اسهال
وانا بطلب حدى يكون ادنى...واطلع على فوق اوى ع المدنه..؟
واطلب هدنه....ويقولو اهو اوم ف العمال..؟
ويقولو اتجنن عم احمد..؟وهيعملو زار...ويذودو طبعا ف الاعمال
اتجنن احسن ..وانا عايش ..احسن م العيش وسط الاندال
جربت تخاف..؟
وتعيش خواف..؟
وتحس بانك خلف خلاف..؟
والناس ماشيين ..خيفين مساكين اشكال واصناف؟
ونقول للناس دول ناس تانيين.؟يقولوك زوق عكس الاعراف
وتشوفهم يضربو 100 تعظيم...مع ان الناس دول مش بتخاف
ويدوسو عليك..وانت تطاطى..وبيسحلو فيك عامل واطى
ويكلم فيك من تحت بوريه...واهو زى كرومبو ابو بلاطى
والزمه كتير بتكون واسعه .... واهى زى الاستك مطاطى
وتلاقى الاصل ابوه علاف
جربت تعيش..؟
جربت تعيش دور التطنيش...جربت مع عكاشه تكاكى
جربت تقول ويا المهابيل...؟ ان التحرير فيه كنتاكى
جربت تقول ...وانا بطلب تنزل للتحرير...اه يا وراكى
جربت تخوف يوم ف الناس..وبدون احساس..؟
تلاقاك بتقول...؟؟
لاانا عاوز اكون ابدا مصرى
ولا عاوز حتى ابقى عراقى
جربت تبص ف وش شهيد
جربت تموت وتعيش موجود وبلبس جديد
جربت تكون ميت ف الارض ..وتحس الارض بموتك عيد
جربت تشوف فى دموع امه او وش ابوه ماسكين ف الشعب الايد ف الايد
جربت تكون ميت مظلوم ويحوطو رقبتك طوق وحديد
جربت تكون سيد الدنيا والناس بتقولك لسه عبيد
جربت الدوس فوق جمجمتك رافع قيمتك وتكون خالد ديما وسعيد
جربت تحس
جربت تبص على الدنيا من تحت لفوق
جربت تسلم على جارك مش تتكلم وبقله زوق
جربت تنادى على الزبال..؟وتقول شكرا شكرا بالزوق
جربت تحس بانك تحت..؟متحسش ديما انك فوق
جربت تنور للناس خير وتنور ليهم نور و شروق
جربت تدوق
وتحس بواحد كان مخنوق
مش لاقى الهدمه ولا رغيف عيش عايش مسروق
واكيد جربت
انك حسيت ...؟
واهو لو حسيت طبعا ...هتفوق
وهتصبح للغرقان ليه طوق
جربت
صدقنى دى مصر خلاص هتروق
وعجبى