لبخيت بن بيومي صاحب المساحة

الأقوال المستباحة في النقد والصراحة3

إلي الملياردير المصري محمد الأمين صاحب القنوات الفضائية
اللي معاه فلوس محيراه
له حق يرفع سيفه
ويشتري كمان قناة السويس
وقناة بنما ويشغلهم علي كيفه!!
إلي المستشار عبدالمعز إبراهيم
رئيس محكمة الاستئناف
حقول لسعادتك
كلمتين لوجه الله
بخصوص المتهمين الأمريكان
والكلام اللي سمعنة
المسنود ع الأمريكان
يعمل ما بداه
ومحدش يقدر يضربوا
علي قفاه.!!
إلي الموزع الموسيقي الشهير يحيي الموجي
بعد البغددة والتربية
والشهرة الدولية
نفذ الوصية الموجية
واعمل لبابا السيمفونية..!!
إلي ولدنا الفنان الموهوب علاء مرسي
بيقولك الأستاذ عمارة
انت موهبة
وخفة دم
وكوميديان منتهي المهارة
اللي ناقصك شوية حظ
ومجلس إدارة..!!
إلي شهر أمشير
أم محمود بتقولك
اللي فينا مكفينا
تبقي انت والغلا والبلطجية علينا
كفاية اللي عملته طوبة فينا..!!
إلي النجم الكبير الفنان محمد صبحي
بيقولك عم عتريس
سواق الأتوبيس
إحنا عايزين نعمل جمهورية
دلفن النفيس
لتنمية الأحاسيس
ونسميها جمهورية ونيس..!!
إلي أعضاء مجلسي الشعب والشوري «تاني مرة»
علي رأي الحاج عبدالفتاح
اوعوا تفكروا إن الجيش
حيسلم البلد لإدارة مدنية
بارتياح
ويسبها سداح مداح
ده حيبقي معاه نسخة من المفتاح..!!
إلي الشاعر الكبير عمنا حسين السيد في ذكراه
يا شاعر ست الحبايب
وساكن قصادي
وفاتت جنبنا
رغم الغياب الطويل
لازلت ساكن قلبنا..!!
إلي وزير الثقافة اللي أنا مش فاكر اسمه
ياما فيك يا مسرحي
من مآسي..!!
مسارح الدولة
العرض مستمر
للستارة والكراسي..!!
إلي الملحن الهايل قليل الحظ فاروق الشرنوبي
رجعت اسكندرية تاني
ربنا يعوض عليك
أخوك والسوسة
هما اللي سرقوا أول
فرصة من ايديك..!!
إلي الصحفي والإعلامي مجدي الجلاد اللي كان رئيس تحرير المصري اليوم
الغاوي ينقط بفلوسه
برنامج تاخد اتعابه
نعمل له جرنان لحسابه
ونهتف له طبعاً ونبوسه..!!
إلي الكاتبن سمير زاهر واللي معاه
علي رأي عنتر الزوق
اللي يفضل في الكورة يسوق
لحد ما يوصلها
من سوق لسوق
كان لازم ربنا يحدف علي الكورة
بلوي مسيحة من فوق
وياريت نفوق..!!
إلي الدكتور ثروت عكاشة أعظم وزير ثقافة مصري
لا تحزن ايها الوزير الفنان
ثقافة الوفاء
رحلت من زمان
ومات العرفان
والمثقفون في عالم التوهان
وكل من عليها فان..!!
إلي الناقد الرياضي الكبير شوقي حامد «اخبار اليوم»
بيقولك المعلم عطية
كرابيجك النقدية
بتلسوع العربجية
في الساحة الرياضية
وبتكشف التعابين
والضفادع الكروية تستاهل التحية!!
إلي الفنان الممثل محمد سعد
بعد الشبع
والجشع
بيقولك ممدوح الجدع
ما طار طير وارتفع
إلا كما طار وقع..!!