شاهد.. الطفل مثير الجدل على"فيس بوك": المراسل ملاني الكلام ووعدني بحاجات حلوة

قال محمد عماد (6 أعوام)، والذي آثار جدلاً كبيرًا على مواقع التواصل الاجتماعي بسبب تصريحاته عن الحكومة، إن "المراسل الذي تحدث معه، قال له ماذا سيقول، أمام التلفزيون مقابل حاجات حلوة".
وتابع الطفل، خلال لقائه مع الإعلامي "يوسف الحسيني" في برنامج "السادة المحترمون"، المعروض على فضائية "أون تي في"، "أنا هعمله محضر علشان يتسجن 45 سنة، أنا مش هضربه ولا أعمله حاجة، هو استني أبويا يمشي، وراح جه وقالي هسألك وتقول كذا وكذا وأنا هجبلك حاجات حلوة كتير".
وأضاف "بصلي وبدعي ربنا إن أبويا يرزقه بفلوس يجبلي كل حاجة، أنا نفسي اتعلم كويس، وأكبر أبقى ظابط وأعيش في بلدي على طول، وابويا اللي قالي كده، ومروحتش المدرسة علشان طلبوا فلوس تبرع وأبويا مش معاه".
واستطرد قائلًا "عاوز أبقى ظابط علشان أبقى جنب الرئيس عبد الفتاح السيسي طول الوقت، ونفسي في بدلة ظابط".
ووعده "يوسف الحسيني"، بتلبية كافة طلباته، وقال "محمد"، "عايز بدلة ظابط، وعاوز أكل وأكبر وأشبع، وأبويا ربنا يرزقه بفلوس كتير".
ورد "الحسيني"، قائلًا "بكرة هيبقى عندك بدلة الظابط، ومصاريف المدرسة هتتدفع بكرة، وبكرة والدك هيستلم إيجار الشقة لشهرين المتأخر، وممكن يكون عندنا فلوس تيجي لبابا كل أول شهر وأي حاجة لها علاقة بالمدرسة هنتصرف مع وزارة التربية والتعليم".
يشار إلى أنه تم تداول مقطع فيديو للطفل وهو ينتقد الرئيس عبد الفتاح السيسي، ويطالبه بسداد إيجار السكن للشباب، وأنه يعارض فكرة التبرع بجنيه لمصر.
شاهد الفيديو..