اكتسى باللون الأسود

أعضاء "فيس بوك": ينفع كده يا وطن؟!

أعضاء "فيس بوك": ينفع كده يا وطن؟!
شباب وبنات
منذ 1 ساعة 23 دقيقة

كعادته اكتسى ال"فيس بوك" باللون الأسود كرد فعل مع أحداث ماسبيرو بالأمس، فيما نقلت صفحاته ومجموعاته مشاعر أعضائه حول الأحداث، والتي اختلفت حول من يتحمل مسئولية الأزمة، وما الحلول لها، أو التعبير عن الغضب والحزن على ما يدور في مصر.
الآراء المختلفة ننقلها كما كتبت سواء من أفراد أو مجموعات، أو جاءت على لسان المشاهير وتناقلها أعضاء فيس بوك..
مش بدافع عن الجيش
على صفحة (بورتو طره من أجلك أنت)، وتحت عنوان (مجرد رأي) نقرأ:
اللي حصل ده مش فتنة (طائفية) لأن ببساطة ده مش جيش المسلمين!.. ده جيش مصر يعني المجند في الجيش مش بيدخل بالديانة.. وكانت ممكن الأحداث دي تبقي بين الجيش وبين أي حد تاني زي مثلا اي قوة سياسية أو حركات...إلخ
ودلوقتي كل واحد ليه اتجاه معين يسأل نفسه.. هل يقتصر التجنيد على المسلمين فقط؟
أنا مش بدافع عن الجيش... بس هل يعقل أنه فيه جيش في العالم يدوس على بالمدرعات بدون سبب واضح؟!!
طيب هل يعقل مظاهرة سلمية يخرج منها قتلي من الطرفين؟!
طيب هل يعقل مظاهرة سلمية يتم فيها حرق مدرعات جيش بلدك وعربياته؟!
وأنا عارف أنه ناس كتير اوووي هتشتمني لأني هنا في الصفحة علشان أعجب الناس لازم أطلع أشتم الجيش بسبب وبدون سبب..
رحم الله كل (مصري) مات في أحداث الأمس.
إمضاء.. مصري
من أكثر ما تناقله الأعضاء كان التعليق الذي اختتم بعبارة (إمضاء.. مصري) ويصاحبه صورة مكتوب عليها (زعلان عليكي يا مصر)، يقول التعليق: (اللي مش عاجبه منظر الكنائس يروح يعيش في السعودية.. واللي شايف إن أمريكا هتحميه يروح يقعد عندهم.. واللي بيترحم على أيام مبارك يروح يقعد معاه في طره.. والناس الباقيه بقى يلا بينا نبني البلد ويكون عندنا إيجابية وكفاية فوضى.. وبلاش نسلمها للجهله.. ربنا يحفظك يا مصر).
كذلك تناقل عدد كبير كلمات الأديب د. علاء الاسواني حول الحداث والتي يقول فيها: (مصر تدفع الان ثمن محافظة المجلس العسكري على نظام مبارك.. لا توجد ثورة تنتصر وتترك النظام القديم في الحكم لأنه بالطبع سيتآمر ضدها بكل الطرق).
"جارتنا المسيحية"
أما الأعضاء فقد نقل كل منهم وجهة نظرة في الأحداث، والتي يدور أغلبها حول علاقة المسلم بالمسيحي، أو الدعاء لمصر، ومن بين هذه التعليقات:
- المسيحي مش آخر.. المسيحي مش أقلية.. المسيحي مش ضيف في بلدك.. المسيحي هو أنت بس الجامع بتاعه اسمه كنيسة والمصحف بتاعه اسمه انجيل والسبحة بتاعته اسمها صليب.
- أتفهم أن مسيحي غاضب يرمي طوبة أو يضرب حتى نار وأتوقع جدا أن يندس بلطجية مأجورين بين الاقباط لضرب الجيش لإحداث الوقيعة والفتنة.. ولكن لا أفهم كيف ينجر الجيش لهذه الفتنة ويقع بسهولة في الفخ ويدهس الاقباط بالمدرعات!! ليشعل مصر كلها !!.
- للأصدقاء جميعا: حاصروا الفتنة ودعاتها.. سوف أقوم بحذف أي حد ينشر أي شيء يحرض على الفتنة، ليس فقط بين مسلم ومسيحي، ولكن أي مادة تحرض على الفتنة بين مكونات هذا الشعب وهذا الوطن. وأدعو الأصدقاء لحذف أي صديق لهم يشتغل بنظام "عبده حريقة" أو "ولعها ولعها".
- الشعب يريد أن يفهم النظام.
- يعني الموضوع بتاع ماسبيرو مش أول مره يحصل.. متعلمناش من الأحداث السابقة.. برجاء البحث عن أصل المرض وليس العرض.. عايزين نبحث عن الاسباب الحقيقة بعيدا عن الاغاني وشيخ بيبوس قس.. وهذه المسكنات.
- اللهم إنى استودعتك مصر.. رجالها و شبابها.. نساءها وفتياتها.. أطفالها وشيوخها.. اللهم إنى استودعتك ممتلكاتها ومبانيها ومنشآتها.. اللهم إنى استودعتك نيلها وأراضيها وخيراتها.. اللهم إنى استودعتك أمنها وأمانها وأرزاق أهلها.. اللهم إنى استودعتك حدودها وبحورها وجنودها.. فاحفظهم بحفظك يا من لا تضيع عنده الودائع وأنت خير الحافظين.
- جارتنا المسيحية خافت تودي أولادها (في ابتدائي) المدرسة النهاردة .. ينفع كده يا وطن؟!!