بقلم: احمد فؤاد نجم منذ 2 ساعة 19 دقيقة قال عبده شمة وهو يطوي صحيفة صباحية بعد أن قرأها تقريباً - خبر إيه أمال يا ولاد؟ كأنها شوطة وطاحت في الصحافة إياك قلت: - طيب يا حاج عبده اللهم اجعله خير فقال: - والله يا عم أحمد لحد دلوكيتي ماباينلهاش خير فقال احمد القزعة: - يافتاح يا عليم يا رزاق يا كريم ع الصبح، نعم يا عم الغيبوبة فقال عبده شمة: - كمنهم تفين في حنك بعض.. كلهاتهم طالبين رد اعتبار للسادات قلت: - وهو السادات جري له إيه فقال: - برضه ياعم احمد السادات هو اللي خد قرار بالحرب قلت: - وانت كنت عايز مين ياخد قرار بالحرب غير رئيس الجمهورية والقائد الاعلي للقوات المسلحة زي ما كان مسمي نفسه؟ فسكت: فقال له أحمد القزعة: - ما ترد يا خبؤ، ابتشمت ليه فقال: - أهم كتلوه في الآخر قلت: - اللي كتلوه في الآخر دول حلفاؤه اللي سلحهم عشان يضربوا الطلبة في الجامعة بالسنج والمطاوي ومية النار وضحك عبده شمة وقال: - حجه يا ولاد «من أعان ظالما سُلط عليه» فقال احمد القزعة: - وليه ما تقولش ربنا بيسلط أبدان علي ابدان وبعدين السادات عملوله فيلم وسموه «بطل الحرب والسلام» عايز ينهب قلت: - اللي يستحق رد الاعتبار فعلا هم ابطال حرب اكتوبر المجيدة والشهداء في المقدمة وييهم المصابون وانا أذكر منهم الآن المجند عبد العاطي صائد الدبابات الذي أذهل المؤسسة العسكرية الصهيونية لدرجة أنه اطلقوا عليه لقب «آكل الدبابات» لانه دمر بمفرده اكثر من اربعين دبابة حديثة ومتطورة ولم يكن سلاحه سوي قاذف صواريخ محمول علي الكتف. فقال عبده شمة: - وي وي وي ودا طبعا بجة بطل عند المصريين كلهاتهم قلت: - المصريين في الشارع وليس في سجلات القوات المسلحة قال: - كيف دا ياعم احمد قلت: - المجند عبد العاطي يا حاج عبده أصله فلاح شرقاوي من قرية من قري مركز منيا القمح وكان دائما يقول لاصدقائه: - ياما كان نفسي يا ولاد أموت شهيد في الحرب وقال احمد القزعة: - سامع يا غيبوبة قلت: - وسمع منه ربنا ونوله الشهادة بعدما انتهت فترة تجنيده فقال عبده شمة: - كيف دا ياعم احمد؟ هو بعد التجنيد رجع يحارب تاني قلت: - الله يفتح عليك رجع يحارب تاني في بلده يحارب الظلم والفساد اللي انتصر علي عبد العاطي وقتله في مستشفي منيا القمح قال: - مش فاهم برضه قلت: - دخل عبد العاطي غرفة العمليات وطلبوا من زوجته حق زجاجة دم لزوم العمليات ولم عجزت سابوه للمرض يفترسه في غرفة العمليات ولا من شاف ولا من دري.. رحمة الله عليه وعلي كل شهدائنا الابرار.
