تلوث الترع يهدد أراضي وماشية فلاحي كفر الجزيرة في بني سويف

حالة من الغضب والاستياء انتابت الأهالي، حيث تشهد مياه ترع كفر الجزيرة في مركز ناصر، التابع لمحافظة بني سويف، تلوثًا شديدًا، يفسد على المزارعين أراضيهم التي تُسقى بمياه هذه الترع.
مراسلنا هناك، رصد تعليقات المواطنين، وشكواهم، من بينهم "خالد.ش"، الذي قال: "موضوع الترع ده كان من زمان، وشكينا كذا مرة للمجلس المحلي لقرية أشمنت، وعملوا
حملات تطهير وتوسيع للترع، وقعدت فترة وخسرت تاني، بقت الترع ملوثة ومليانة زبالة، وكل حاجة مرمية فيها، وعايزينّا كمان نسقي منها" .
فيما قال "ناجى.ر" (مزارع): "أنا الأرض بتاعتي على أول طريق مدخل كفر الجزيرة، ويعتبر أنا من أول الناس المتضررين بسبب الترع دي. باجي أسقي الأرض مش بلاقي
مياه نضيفة، فبضطر إني مسقيش، ولو سقيت الأرض هتبوظ، وكده مش هستفاد أي حاجة، وكلمنا المسئولين لكن مفيش اهتمام منهم ومفيش متابعة"
أم جمال تربي ماشية، والأمر يضرها حسب قولها: "البهايم بتاعتنا ماتت من الترع، مفيش أدامنا إلا الترعة دي عشان نسقي منها، فسقينا والبهايم ماتت، والأرض جوانب كتير منها بقت مش أرض" .
وأضاف "سيد.ط": "إحنا ناس فلاحين عايشين على الزراعة وتربية البهايم، الأرض بقينا بنرويها بمياه المجاري، ومياه الترع اللي هيا مش صالحة أساسًا، والبهايم ماتت" .
وختم الحاج شعبان قائلًا: "هما قاصدين الفلاحين في كل حاجة، مش عايزينّا نروي، مش عايزينّا نشتغل، عايزينّا نقعد في بيوتنا السنادي، كل حاجة بقت ضايعة، البطاطس خسرت، والبرتقال والمحاصيل كلها، وكمان الأرض بقت مش نافعة، هما عايزينا نسيب الأرض بتاعتنا ونمشي".