مطلوب منه الحفاظ علي الأراضي الزراعية

أجمع مزارعو الشرقية علي أنهم عاشوا طوال ال30 عاما الماضية سنوات من العذاب والمذلة والمهانة وعدم راحة البال وأنهم يريدون من الرئيس القادم للمحروسة مصر أن تعود إليهم حقوقهم بحكم أنهم العمود الفقري وعصب التنمية ومن غيرهم سوف لا يأكل أحد العيش الحاف.
يقول محمد السيد محمد "مزارع" أحب أن أقول بالفم المليان بعد أن رأت مصر النور والحرية أملنا في الرئيس القادم كبير ومساندة كافة الفلاحين الغلابة الذين يفنون أعمارهم في الأرض من أجل لقمة العيش ولابد من رعاية صحتنا التي تدهورت بسبب المبيدات المسرطنة وتوفير البذور المنتقاه والمبيدات السليمة ومحاسبة من تسول له نفسه ارتكاب أي أعمال تضر بصحة الفلاح أو الأرض التي هي مصدر رزقنا الوحيد.
أضاف أنه يجب أن تكون هناك متابعة مستمرة لكافة المزارعين صحيا واجتماعيا وذلك عن طريق لجان تمر ليتفرغ الفلاح لزراعة الأرض.
يؤكد جمال عبدالحفيظ "مزارع" الظلم خلاص ودع البلد واحنا عاوزين من الريس القادم أن يمنع ظاهرة إلقاء مياه الصرف الصحي في الترع التي يروي منها الزرع يسقي منها البهائم ولابد من وقف هذه المهزلة ويرحم أيام زمان لما كنا بنشرب من مياه الترع وكانت كلها خير لكن الآن كلها أضرار.
قال موسي موسي عطية "مزارع" طول عمرنا عايشين في العذاب واحنا حابين من الريس الجديد أن يهتم بتوفير الأسمدة الزراعية لأن الأرض حالتها دلوقتي لا تسر عدوا ولا حبيبا ومعظم الفلاحين كانوا يضعون كميات بسيطة لأن سعر الشيكارة كان 75 جنيها وغير موجودة في الجمعيات الزراعية في السوق السوداء وسعرها كان 175 جنيها وهيجيب منين الفلاح الغلبان قليل الحيلة أنا أعرف أن فيه فلاحين باعت مواشي علشان تشتري سماد لكي تنقذ أراضيها.
أضاف: وكمان التقاوي هي الأخري لابد من توفيرها وبأسعار تناسب الفلاح لأن الأسعار حقيقة غالية قوي وفوق طاقة الفلاح إلي معظمهم يقضي عشاه نوم.
محمد السيد "مزارع": احنا بنقول للريس اللي جاي الفلاحين عددهم كثير وسند لأي حد وهم اتظلموا ولابد من ربط أسعار لجميع المحاصيل الزراعية علشان يتشجعوا ويهتموا بالأرض وبالتالي يعود الخير علي البلد فمثلا لما يتربط 2000 جنيه لطن الأرز و500 جنيه لأردب القمح سوف تزيد المساحات المزروعة وسوف يحقق الاكتفاء الذاتي ومش هنمد ايدينا لحد تاني وسنأكل رغيف عيش كله فوايد مش مصايب بسبب القمح المستورد.
أما محمد علي خليل "مزارع" فيقول: الفلاح المصري اتكوي من أسعار الأعلاف الخاصة بتربية المواشي والدواجن وبدل ما كان بيكسب اتخرب بيته واحنا عاوزين من الريس القادم توفير الأعلاف بأسعار علشان نعرف نربي المواشي تاني وبالتالي ده هيخلي أسعار اللحمة تنزل علي الآخر ومش هنستورد لحمة مش مضمونة وتجيب الأمراض واحب أقول ان احنا كمان عاوزين من الرئيس الجديد دعم الفلاحين المربين للماشية لتشجيعهم علي ذلك علشان الخير يعم علي الجميع.
قال صبري يونس "مزارع": احنا نريد من الريس القادم رعاية الفلاحين صحيا وكمان مواجهة ظاهرة التعديات علي الأراضي الزراعية مصدر الخير لشعب مصر لأن العملية لو فضلت علي كده يبقي عليه العوض واحنا والله نبكي بدل الدموع دم لما تشوف الأرض الزراعية اللي احنا بناكل منها بتبور أو بتبني عليها ولابد من إظهار العين الحمراء وإزالة التعديات للكبير قبل الصغير.
أشار إسماعيل يس "مزارع": مطلوب من الريس الجديد توفير مياه الري للترع المحرومة لأن اعتمادنا علي مياه الصرف الزراعي أو الصحي تضر الصحة العامة وكمان تضعف الأرض وتخليها "تطبل" وإنتاجيتها تقل وكمان زراعة الأصناف الجديدة مثل الأرز إلي بتقولوا عنه الجاف لتوفير مياه الري اللي احنا بنشتكي منها.
الحاج أحمد جلال "مزارع" قال: نريد من الرئيس القادم زراعة القطن المصري طويل التيلة اللي العالم كله كان بياخد منه وتشجيعنا علي زراعته بتحديد أسعاره لأن زراعة القطن ده كانت بتحل كافة مشاكلنا وكنا بنزوج أولادنا منه.
ياسر أحمد عمارة "مزارع" أوضح نتمني من الريس الجديد توفير مياه شرب نقية نعرف نشربها وتوصل للأدوار العليا علشان ابني وابنتي اللي قاعدين معاي يشربوا لأن المياه الحالية مضرة بالصحة ورائحتها كريهة وتسبب الأمراض للعديد من الفلاحين ومنهم اللي مات بعلته سواء بالفشل الكلوي أو السرطان.
فتحية عبدالعزيز- ربة منزل: عاوزين تغطية المصارف "الرشاح" اللي بتمر بالقري بالكامل علشان دي مصيبة كبيرة في الصيف قبل الشتاء وبعدين الناس بترمي فيها الحيوانات الميتة وكلها بلاوي.
علي عبدالباقي "مزارع" عاوزين تعليم كويس لأولادنا زي زمان ونبطل الدروس الخصوصية اللي احنا مش عدنا عارفين نوفر ثمنها والمدرس يتابع ويشرح كويس في الفصل علشان نرجع ندعي ليهم تاني.