سرقة بالإكراه وسحل مواطنة وسط القاهرة.. والشرطة تتفرج وتتهرب من تحرير محضر

هذه القصة روتها سيدة اسمها منى سلطان تعمل فى معهد الاورام تكشف عن واحدة من حوادث السرقة بالاكراه وسط العاصمة رغم وجود عدد من افراد الشرطة اثناء السرقة وهو ما يمثل استهتار اوقل رعاية الشرطة للصوص والبلطجية او من يطلقون عليهم المواطنين الشرفاء .. قالت فيها
يوم الأربعاء الموافق 12/10 بعد انتهاء نبطشيتي بالمعهد القومي للأورام الساعه 8:30 مساء
رحت كعادتي اركب من محطه فم الخليج وبعد مرور اقل من 10دقايق فوجئت بضربه علي راسي بلف وشي لقيت بوكس في عيني خلاني افقد توازني وقعت علي الارض وانا في نوبه صراخ هيستيري باستنجد بالناس اللي حواليا علي المحطه بالاتنين عساكر المرور وأمين الشرطه اللي علي بعداقل من 10متر مني كنت حاسه أني بتسحل لمسافة كذا متر لحد ما جروني تحت الرصيف واتخبطت في حجر فقدت قدرتي علي المقاومة في وقتها وقفت سيده بالسيارة فاخذوا شنطتي وجريوا ركبوا موتوسيكل واختفوا بعدها لقيت الرجاله اللي علي المحطه اللي كانوابيتفرجوا جاين يشدوني صرخت فيهم (ماحدش يلمسني انا هقوم لوحدي) وقفت وروحت البيت وانا في حاله انهيار تام وبكاء هستيري وحكيت اللي حصل .. اخويا أخذني زي ما انا بهدومي المتبهدله بالتراب والدم من الجروح (قسم مصر القديمة) نعمل محضر بالواقعة .. في القسم بعد ماحددت لهم المكان بالضبط قالوا الرصيف ده مش تبعنا ده تبع (قسم السيدة زينب) روحوا قسم السيدة .. رحت قسم السيدة وهناك بعتوا معانا لجنه معاينة لمكان الحادث ولجنة المعاينة قالت لا إحنا اخر حدودنا الرصيف اللي في نص الشارع لكن الرصيف ده تبع (قسم مصر القديمة) علما بان المسافة بين الرصيفان لاتتجاوز 5 متر مش هينفع نعملك محضر ارجعي (قسم مصر القديمة) رجعت لمصر القديمة بردوا مصممين علي رأيهم ان الرصيف ده مش تبعهم فكلمت لجنه المعاينة عشان تبلغهم ان الرصيف اللي حصلت عليه الحادثة تبعهم ولما اقتنعوا قالوا مش هينفع نعمل محضر أصل احنا ماعندناش ختم ..
الموظف اللي معاه الختم مشي الساعه 2 تعالوا الصبح بدري .. فرجعت (قسم السيدة زينب) وعملت محضر تتبع للتليفون اهي اي محاوله اثبت بيها حقي .. ورجعت بيتي وانا بردانة بردانة قووي ما اقدرتش اغسل جروحي تاني يوم من قبل 8الصبح كنت في (قسم مصر القديمة) رفضوا يعملوا محضر لان ديه سرقه بالاكراه لازم معاون المباحث هو اللي يعمله والبيه هيجي علي الساعه 3 قولتلهم هستني رفضوا أصل ممنوع الانتظار جوه القسم .. خرجت ورجعت قبل 3 قابلت البيه معاون المباحث اللي بعت لجنه المعاينة عشان يتأكدون الرصيف تابع ليهم ورحت مع لجنه المعاينة واتاكدوا وسالوا أمين شرطه وعسكري المرور اللي أكدوا حدوث الواقعه ولما اخويا سال أمين شرطه المرور ليه ما أدخلتش؟ قاله كان معايا تليفون!!!!!! وبعدين احنا ماعندناش مسؤوليه قانونيه احنا مآينفعش نسيب الاشاره !!!
رجعنا القسم مع أمين لجنه المعاينة اللي غير اقواله قدام معاون المباحث (لانه ماقبضش) وقال ياباشا مفيش حاجه حصلت والأمن مستتب !!!
فقالي مفيش شهود علي الواقعه ما اقدرش أعملك محضر .. انا عايز اثبت حاله حضرتك مش جايه اتهم حد .. فقالي هو اي حد يجي من الشارع يقولي اعملي محضر اعمله !!! ..
طيب واللي حصل فيا؟ قالي اثبتي؟ فقلت له انا عندي إثبات (الجروح والكدمات اللي في جسمي) قالي خلاص هحولك للمستشفي مدام سيادتك مواقفه تقلعي وتكشفي مع نظره مهينه .. ورحت مستشفي دار السلام البعد الكشف اثبتوا في التقرير الطبي وجود كدمه في فروه الرأس أدت لارتجاج بسيط في المخ وكدمه بالوجه وعدت كدمات في الذراعين والقدمين وعده جروح بالكوعين والركبتين مع اثار أظافر باليد اليمني .. ورفضوا يدوني تقرير لان التقرير لازم يستلمه القسم ...
رجعت (قسم مصر القديمة) رفضوا يعملوا المحضر قالوا ابقي عدي علينا بعدين لما نبقي نستلم التقرير بس اخويا كان فهم ودفع للامين اللي بعت في الحال عسكري يستلم التقرير .. وبعدها اضطر البيه المعاون انه يعمل محضر بالواقعة بعد مرور اكتر من 22 ساعه بتنقل فيهم من قسم لقسم لمكان الحادث .. بعد 22ساعه بتعامل فيهم معامله الجانيه مش المجني عليها ..الاهانه اللي شفتها في أقسام الشرطه عشان اثبت حقي اكبر بكتير من الاهانه اللي شفتها من الاتنين اللي
اتهجموا عليا لأَنِّي ماعنديش واسطه .. انا وصفت اللي حصل معايا بس ماوصفتش إحساسي لانه مايتوصفش.ورقم المحضر2014/16529 مصر القديمة
ترى هل حدث مثل هذا فى اى عصر من عصورها ؟ وهل حدث مثل هذا فى اى بلد فى العالم ؟