مبادرة " ماتحِفش " تتصل بالسيسي ليرسل رغيفه!!

لم نكن ندري أن سبب الأزمة الاقتصادية الطاحنة في مصر وحلها أيضاً يأتي من تحت الطبلية ومن أفواه الأطفال الصغار
ومن الفقراء المفجوعين أكلة الخبز الحاف الذين لا يجدون تغميساً فيستهبلوا ويُدخلوا مصر في أزمة اقتصادية لا مخرج منها إلا إذا .. إلا إذا .. إلا إذا .
دقيقة واحدة يا أستاذ وسيب الرغيف اللي في إيدك ده ، انتظر المرشح الرئاسي العبقري بيفكر وكما قال له أبو حمالات : صمتك ده له معني .. يا عيني علي صمته والنبي صوته حلو وأحسن من كلامه... . ياريته يصمت للأبد !!
قال عبقري الاقتصاد الذي جاء لمصر ب2مليار جنيه في دقيقتين عند استخدام اللمبة الموفرة .
قال إن الأزمة الاقتصادية حلها يتلخص في تقطيع العيش أربع ترباع وكل واحد يوفر رغيف .. فلو 25 مليون مواطن كل واحد وفر رغيف هايبقي عندنا 25 مليون رغيف .. شوف انت بقي وفرلك كام في دقيقة واحدة بس !!
لا وإيه ده طلع عبقري في الحساب كمان
أول مرة أعرف إن لو 25مليون مواطن كل واحد وفر رغيف هايبقي عندنا 25 مليون رغيف ، الله برضه .. سبحان الله !!
هذا وفور انتهاء لقاء السياسي بابو حمالات وحمالة الحطب تكونت مبادرة من أشهر الجائعين من أكلة العيش الحاف في مصر في حب مصر وأطلقوا عليها ( مبادرة ما تحفش في العيش ) وذلك لدعم اقتصاد السيسي ب 25 مليون لقمة !!
وسوف يرسل أعضاء المبادرة مندوبهم يومياً علي باب الاتحادية لتلقي رغيف السيسي وذلك مشاركة منه في تفعيل المبادرة راجين من سيادته أن يشرح للشعب المصري في جزء ثالث من حوارات ألف نيلة ونيلة .. مع إبراهيم وجميلة
كيف يتم تقطيع الرغيف اللي قد الكف لأربعة قطع !
اقتراح أخير
يوجد لدينا اقتراح أخير بعد أن تنفست مصر الصعداء من الحلول -العبأرية- التي استطاع بها الرئيس المنتظر حل مشاكل مصر وتوفير المليارات في دقائق معدودات والاقتراح هو :
احنا نودي السيسي ده مبني ماسبيرو ونجيب له كرسي مريح ونضع أمامه كاميرا ونسيبه يفضل يتكلم.. يتكلم ... يتكلم
وكل ما يتكلم الساعة بتعد دقايق دقايق تتحل فيها كل مشاكل مصر لحد ما هايفوت وقت طوييييييييييييل وهانبص نلاقي دول الخليج بتشحت مننا !.
نقوم نجيب السيسي من ماسبيرو فورا أحسن لو زود ساعة كمان هانموت من الرفاهية.