أبرز 30 تصريح للسيسي في مؤتمر الشباب

على مدى ثلاثة أيام التقى الرئيس عبد الفتاح السيسي حوالي 3 آلاف شاب من قطاعات مختلفة في حوار مفتوح بالمؤتمر الوطني للشباب في مدينة شرم الشيخ.
وتضمنت تصريحات السيسي خلال كلماته ومداخلاته بجلسات المؤتمر وعودا ورسائل وتحذيرات، ركز فيها على مطالبة الشعب المصري بالصبر والصمت حيال الأزمات التي يواجهها المجتمع، ودعا الشعب إلى مساندته والمشاركة في تحمل المسؤولية.
وفيما يلي أبرز 30 تصريحا للرئيس خلال مشاركته في الجلسات:
*كلام النقد بقبله ولو أزيد من اللزوم بستحمله.
*اللي يحب نفسه.. هايضيع بلده.
*أهل الشر" موجودين في كل مكان.
*زي ما الثورة جابت مكاسب.. جابت كمان جنبها تحديات.
*في نهاية المدة ماقدرش أقعد يوم زيادة.
*أنا أمين عليها.. يهمني أن كل إنسان مخلص وشريف يكون معايا.
*كل الأحزاب الموجودة مقدرة.. ومحدش بيمس حد.
*حجم خوف الستات على البلد أكتر لأنها بتخاف على البيت الكبير.
*ترتب على زيادة المرتبات تحمل الدولة 150 مليار جنيه سنويا بالسلف والاقتراض.
*خلوا مطالبكم ماتخدش الشكل الاحتجاجي اللي هايضرنا كلنا ويعطل الدنيا.
*ماحدش بيحاسب حد على التعبير.
*قانون التظاهر تم عمله في وقت مصر كانت فيه على المحك.
*لابد من تحقيق استقرار نسبي لزيادة معدلات السياحة.
*كل ما هاتعرفوا أكتر كل ما هاتخافوا على بلدكم أكتر.
*كان ممكن أخلص الفترة المتبقية وتعدي وشكرا واسلمكم للمجهول بعد كده.. لكن اخترت الطريق الصعب.
*اللي بيكلمكم دا واحد منكم.. أنا والله العظيم قعدت 10 سنين تلاجتي كان فيها مايه بس ومحدش سمع صوتي.
*الرصيد اللي موجود ليا عند الناس يسمح لي أكمل ولا ما كملش ولما ينتهي الرصيد هينتهي إزاي، هذه النقطه مهمة جدا.
*مش الرئيس والحكومة اللي اتغلبوا على المعوقات.. المصريين هما اللي اتغلبوا عليها بتماسكهم.. وادعوا لمزيد من التماسك.
*لوعملت الإصلاح هيبقى ضاغط على الناس وهتتقبله أو ما تتقبلوش ولو معملتوش الأمر هيزداد تأزما.
*أنتوا اللي هتحددوا مصير مستقبل مصر مش أنا.
*كفاية نحرج اشقائنا أكتر من كده.. أن هما يدعمونا كفاية إن إحنا نحرج الناس ونحرج نفسينا ومش هقول أكتر من كده.
*لما أنتوا كلفتوني أقف جمبكم مترددتش ثانية ومفكرتش أبدا في نفسي ولا حتى في أبنائي.. فكرت فيكم أنتوا وخفت على مصر لتضيع.
*أنتوا وعدتوني أنكوا هتقفوا جنبي.. أنا دوري معاكوا عملتوا وقلت ليكوا المشكلة كبيرة من الأول خالص.
*الإصلاح الاقتصادي بياخد وقت ومفيش حل غير الصمود.
*صدقونى في جهد منظم خبيث بره وجوه.
*أنا مش طالب حياتكوا.. أنا طالب أن إحنا نبقي أمة ذات شأن تصبر وتتحمل وما تتكلمش خالص.
*موارد الدولة حتى لو اتحشدت كلها للتعليم قليلة.
*كل الدول بتحط التعليم أولوية أولى.. بس يا ترى المصريين كانوا هيستحملوا أن كل الفلوس المتاحة -وهي قليلة- تتحط للتعليم وباقي الأمور تتساب؟
*كنت أقدر أقول للناس اللي شغالة في المشروعات القومية للدولة استنونى10 أو 15 سنة علشان أصلح التعليم واحط كل موارد الدولة في التعليم وهي في النهاية قليلة.
*اللي في مصر دول ولادي وعاوزهم أحسن حاجة في الدنيا بس أزاي أعمل كده أزاي؟