باسم مرسي يكشف تفاصيل "خناقته" مع جمهور الأهلي

كشف باسم مرسي، مهاجم فريق الزمالك، تفاصيل المشادة التي حدثت بينه وبين بعض مشجعي النادي الأهلي، في تونس أمس.
وقال مرسي، عبر حسابه على الإنستجرام: "توضيح لمشكلة إمبارح اللي كل واحد طالع عمال يحلل ويقول كلام على مزاجه، أنا من أول ما لعبت في نادي الزمالك، وأنا بتشتم بوالدي ووالدتي وبيتقال عليا كل حاجة ممكن تتقال تنك مغرور، ده عايشها على الناس، بيزعق وبيتنرفز على اللاعيبة، بيشتم زمايله في الفريق، عايز كل كورة تتباصى ليه، عايز هو بس اللي يجيب جول ده، بيروح للحلاق أكتر ما بيدخل الحمام".
وأضاف: "كل حاجة بعملها شاغلة الناس أجيب جول ده بقى تنك ومغرور مجبش جول ده مستواه بقى وحش ومبقاش زي الأول، أطول شعري مش عاجب، أقصره مش عاجب، كل يوم اتصور مع الناس ومش عاجب، ويوم ماكون تعبان من التمرين ومش قادر اتصور علشان بيبقى ورايا التزامات تانية ابقى تنك ومغرور، ده أنا بقيت أخاف أقول لحد السلام عليكم ليقولك باسم اتجنن ماشي يقول للناس سلام عليكم".
وتابع: "عارف إني مش هعرف أرضي كل الناس علشان لو رضيت كل الناس هبقى منافق كل ده ولا أثر ولا هيأثر فيا علشان أنا عارف طريقي كويس وعمري ماعملت ولا هعمل مشكلة بسبب التفاهات دي، وعارف إن ضريبة إني بلعب تحت اسم كيان وجمهور كبير هو نادي الزمالك اللي علشانه بجد ممكن أعمل أي حاجة، إنما توصل إن النادي اللي بلعب وبموت نفسي علشاه يتهان واسمعها بوداني أكتر من مرة، ومردش وأجيب حقه من اللي غلط فيه ابقى مش راجل، اللي عايز يغلط فيا براحته مش هرد عليه بس نادي الزمالك خط أحمر، ولما بنقول ربك وطنك ثم الزمالك دي مش كلمة ولا شعار بنقولوا وخلاص، ده شعوره حسينه ومصدقينه بجد".