بالصورة..رسالة مؤثرة من زوجه لزوجها بعد موتها

نشرت صفحة Secret room للمشاكل الاجتماعيه رسالة من زوج يروي فيها قصة وفاة زوجته التي داهمها المرض بعد اا شهر من زواجهم وتفاعل اعضاء الصفحه مع الرسالة بشكل كبير نظرا لما تحتويه رسالة الزوجه لزوجها من كلمات مؤثرة .
وكانت رسالة الزوج كالتالي :
دى أخر رساله من نيره مراتى هى فعلا دلوقتى مبقتش موجوده
أنا مكنتش حابب أشارك حد ابدا قصتى دى بس أنا نفسى مصر كلها تدعيلها نيره ماتت بعد 11 شهر جواز بعد شهر ونص من جوازنا اكتشفنا ان عندها مرض خطير وعلاجه صعب جدا لما كنت أقعد معاها وأقولها متزعليش تقولى انت اللى متزعلش أنا عارفه إنى مش هعيش علشان أحققلك أحلامنا اللى حلمناها سوا نيره مكنتش مجرد زوجه نيره كانت بتحس بيا من خبطتى على الباب نيره لما كانت تمسك ايدى كنت بحس إن الدنيا دى مفيش فيها ولا هم ممكن يشغل بالى عن أى لحظه بعيشها معاها نيره ماتت وسابتنى بتعذب فى اللحظه ألف مره نيره كل اللى كان شاغلها وهى بتفارقنى إنى أعيش مبسوط من بعدها بس إزاى هى تخليت إنى ممكن أدوق طعم السعاده من بعدها أنا بترجى من كل واحد فيكم يدعيلها ويدعيلى أحصلها فى اسرع وقت موته واحده أهون عندى من مليون موته فى الدقيقه بالله عليكم بالله عليكم إدعولها
وكانت هذه هي رساله الزوج لاعضاء الصفحه مطالبهم بالدعاء له وزوجته بالرحمه .
حبيبى إنت هنا صح معنى إنك بتقرأ الرساله دى دلوقتى يبقى أنا مش موجوده علشان أمنعك تمسك النوته بتاعتى كالعاده يعنى أنا هستغل وجودك دلوقتى لواحدك وأقولك إن كان نفسى أكمل عمرى كله معاك والحمد لله ربنا حققلى دى بس مكنش نفسى أبدا أبهدلك معايا فترة تعبى حقك عليا ياحبيبى متزعلش أنا هبقى أشهد لربنا إنك أغلى واحد فى الدنيا وإنك مقصرتش معايا خالص وإنك راعيت ربنا فيا لأبعد الحدود أنا بموت فيك وعوزاك تتجوز علشان يبقى ليك إبن شايل إسمك زى ما إتمنينا وبالله عليك بلاش تعيط متعذبنيش بدموعك دى سلام بقا يارخم علشان النوته خلصت ومتقلقش ياض أنا معاك علطول شيفاك وحساك بس إنت إدعيلى بقا ربنا يغفرلى لو فى يوم قصرت فى حقك وإوعى تطلع ندل ولما تدخل الجنه تروح تتجوز حوريه وتطنشنى ولا أقولك مش مهم المهم تبقى مبسوط ياحبيب قلبى أنا مش هودعك علشان أنا مفارقتكش بس إوعى تنسانى بدعائك ليا أه ياحبيبى قبل م أنسى متفوتش ولا فرض وإوعى حد يحتاجك فى يوم وتبخل عليه بمساعدتك بحبك بقا يلا إمشى علشان ماما زمانها بتنادى عليك