«أسف يا ريس» تنشر فيديو ل محمد عطية: كنت في مصطفى محمود بأيد الرئيس مبارك

«فضيحة محمد عطية وهو يؤيد الرئيس مبارك»، تحت هذا العنوان نشرت صفحة «أنا أسف يا ريس»، المؤيدة للرئيس الأسبق حسني مبارك، فيديو يكشف تأييد الفنان محمد عطية ل«مبارك» أثناء ثورة يناير ومشاركته المظاهرات المؤيدة له في شارع مصطفى محمود.
ويعود الفيديو الذي نشرته الصفحة لوقت ثورة يناير، وهو لمداخلة هاتفية قام بها «عطية» مع الإعلامية لبنى عسل على قناة الحياة الفضائية بعد خطاب «مبارك» الثاني، والذي استعطف فيه الجماهير وسبق موقعة الجمل.
وقال «عطية» في المداخلة: «عايز أقول على ثلاثة مواقف حصلوا معايا شخصيًا، ثلاثة مواقف عشتهم النهاردة وأنا في مظاهرة مصطفى محمود بأيد الريس حسني مبارك، وأنا راجع على بيتي في أرض الجولف نزلت أشوف ايه الوضع في ميدان التحرير، أقسم بالله الكلام ده حصل، شفت النهاردة واحد بيتكلم بيتكلم عربي مكسر شكله مش مصري قال لي أنت داخل أنهي مظاهرة، فمهمتش هو عايز يقول لي ايه، قال لي لو داخل هنا قول لي عشان أقول لك تعمل إيه، سيبته ومشيت».
واستطرد: «بعديها وأنا جي، سواق تاكسي، أنا نزلت على اللمة، سواق تاكسي عند أول الشارع بتاعي، في اللجنة العسكرية اللي عملنها، أنا نزلت على اللمة اللي معمولة على راجل، الجمهور عايز يضرب حد والجيش بيحوش عنه، نزلت لقيت سواق التاكسي بيقول يا جماعة الراجل ده بيكلمني بقاله ساعة في حاجات أنا مش فاهمها، لما الجيش مسكه طلع مش مصري، طلع إيراني تقريبًا راجل بدقن».
وتابع: «وفي صحابي كانوا في المظاهرة بتاعة يوم 25 وفضلوا في الشوارع لغاية إمبارح، لما جم ينسحبوا بعد خطاب الريس، الناس قالوا لهم هنديكوا فلوس زيادة وأقعدوا، أقسم بالله الكلام ده حصل».
وظهر الفنان الراحل خالد صالح في الفيديو، حيث كان ضيف «عسل» في الأستوديو، وهو من المؤيدين والمشاركين في ثورة يناير، وبدا على وجهه عدم الرضا بما يسمع من «عطية» طوال فترة المداخلة.