السيسي ل"المستثمرين": "أنتم في أمان ولن يبتزكم أحد.. وما أقدرش آخد بسيف الحياء"

فاجأ الرئيس عبد الفتاح السيسى، رئيس الجمهورية، الحاضرين منتدى الحوار الذي تنظمه جريدة الأخبار، برئاسة الكاتب الصحفي ياسر رزق، رئيس مجلس إدارة أخبار اليوم، ورئيس تحرير جريدة الأخبار، ووجه الرئيس عدة رسائل طمأنة وتحفيز لرجال الأعمال، مؤكدا دورهم الكبير في نهضة مصر من حيث التنمية الاقتصادية والمجتمعية لمصر، مضيفا "احب ان اطمئن المستثمرين ورجال الاعمال انتم في أمان، ولن يبتزكم أحد، وما أقدرش آخد بسيف الحياء".
وقال الرئيس - في حواره مع عدد من كبار رجال الأعمال -: "أنا عايز أقول لكم بصراحة وكلكم رجال أعمال شقيتم وبذلتم جهدا مقدرا جدا ربنا وفقكم فيه، وتعرفون جيدا ماذا تعني كلمتي اقتصاد ونجاح.. وأكيد تعرفون ماذا يعني الفشل.. أنا بتكلم في هذا الإطار بالنسبة لمصر.. شايفكوا ناس مخلصين.. بذلتوا جهدا حقيقيا بعرق، لا يستطيع أحد أن يتكلم فيه خالص.. عايز أقول لكم إن مصر مهددة وأرجو أن يكون ذلك ماثلا أمام حضراتكم.. لا أقول ذلك عشان أقلقكم.. فأنا علي المستوي الشخصي كانسان وعلي مستوي الدولة معك وجنبك لأساعدك في كل شيء.. لأن نجاحك نجاحي".
وأضاف "النهاردة لو عندي في مصر ألف رجل أعمال.. كل واحد عنده ألف مليون.. أنا هبقى سعيد جدا.. لأن ده في الآخر لمصر، بيشغل ناس وبيأكل الناس عيش.. مفيش كلام في ده.. لكن فيه نقطة مهمة جدا.. ممكن واحد وهو مهتم بعمله مركز علي كل مسارات النجاح.. الفشل يبعده لو مخدناش بالنا من السياق العام اللي بتمر بيه منطقتنا بالكامل".
وأكد السيسى لرجال الأعمال، "أنا إنسان واضح جدا.. ولكني لن أظلم أحدا.. هذا خط أحمر وليس مجاملة لأحد.. هذه حقيقة، و"مقدرش آخد حاجة من أحد حتى بالحرج.. بالحياء.. مقدرش أعمل كده.. وده مبدأ".
وشارك في المنتدى الذي أداره الكاتب الصحفي ياسر رزق، وعدد كبير من كبار رجال الأعمال في مصر منهم: نجيب ساويرس، ومحمد أبو العينين، ومحمد فريد خميس، وصلاح دياب، وصفوان ثابت، وحسن راتب، أحمد أبو هشيمة، محمد الأمين، شريف الجبلى، وليد هلال، د. محمد العزبى، كما شارك فيه عدد من كبار الكتاب والصحفيين بالمؤسسة.
وقال الرئيس: إنه يرى مجموعة متميزة من رجال الأعمال، مضيفا "لو إن كل واحد من منهم لو حط أيديه مع زمايله وأنشأوا 10 أو 12 مشروعا ضخما سننجح.. وأمامنا نماذج نجاح لشركات كبرى".
ووجه رسالة واضحة لهم: "مطلوب من حضراتكم دور لاشك فيه.. بس الدور ده تستدعيه حاجة كبيرة.. سأقسم يمين عليكم.. أقسم بالله العظيم.. أقسم بالله العظيم أنا لو معايا 100 مليار دولار لأديهملك يا مصر من غير تفكير.. والله من غير ما أفكر.. ولا فيه حد ابدا يذل بلادي ويهينها ويكسر خاطرها".
وأضاف، "أنا غني لما تكون بلادي غنية.. وأنا فقير مهما كنت غني لو بلادي فقيرة.. أنا أمد أيدي وأخويا معاه جنبي.. أنا مش بقول كده عشان أقولك فين دور الأغنياء.. لا أتحدث عن الفلوس والكلام ده.. أنا بكلمك عن ضميرك الوطني.. الكلام ده بعيد عن الناس اللي بتسمعني ولا إيه؟.. لا.. روح لضميرك.. تسيب بلدك.. تسيب بلدك تضيع وانت قاعد..إيه ده؟..أنا الكلام ده بقوله لنفسي والله".
وعن الموقف الاقتصادي قال الرئيس: إحنا خدنا مش أقل من 25 مليار دولار في العشر أشهر اللي فاتوا، 25 مليار.. يعني 200 مليار جنيه.. وفي نفس الوقت عجز الموازنة بتاعنا مازال فوق 200 مليار جنيه.. يعني المفروض كده العجز بتاعنا يبقي 450 مليار.. طيب لغاية دلوقتي ولغاية الشهر الجاي البترول فيه 900 مليون دولار بيدفعوا للبترول يعني 50 مليار جنيه بقالهم عشر أشهر دول مش محسوبين خالص.. يعني كام 50 مليار كمان.
وتابع: "إحنا بنتحرك في البلد وهناك فصيل شغال علي المعركة اللي بينا وبينه.. هو عارف إن العوز هو مشكلة المصريين.. وهوا بيلعب عليها ..يقوض الدولة دي بايه؟.. بأن كل النجاحات لاستمرار الدولة المصرية تتوقف بعجزاقتصادي يخليها تقع ..تعمل إصلاحات فوق تصور الناس ومش هتقدر تستحمل،أنا بس بقول ده وهسيبه للندوة تفكر فيه ..فقد وصل الدعم السلعي للضعف".
وقال: "يعني كل اللي إحنا عملناه والناس كلها في مصر أتكلمت عليه ( يقصد زيادة أسعار الوقود ) سيحقق 51 مليار من دعم 250 مليار جنيه.. من 251مليار.. مش يعني فاتورة الدعم خلاص خلصت ..لا ..ده جزء بسيط من هذه الفاتورة ..قلنا العجز بدلا من أن يكون 350 مليار يبقي 250 مليار".