لمؤاخذة!

فلان: ايه رأيك ناكل سوا "لقمة" علي السريع!
علان: أنا كل ما أشوف منظر الرغيف أبوشلن.. والناس الغلابة في الطوابير بتعاني الأمرين علي رغيف الوزة اللي عندنا من كام يوم سابتنا وطفشت لما حطينا لها رغيف منه.. باختصار حاجة تسد النفس بعيد عنك!
فلان: من مين بالظبط؟
علان: من حكومة بتدفع الشيء الفلاني عشان حرامية الدقيق يبقوا مليونيرات باسم الدعم.. والغلابة ياكلوا الزلط.
فلان: اوعي تنسي بتاع الفرن اللي ما عندوش ضمير.
علان: ورقابة الحكومة فين؟
فلان: طيب ما تقول لنا ممكن نحل المشكلة إزاي!
علان: يا إما كل واحد ياخد حقه ناشف من الدعم.. يا إما الحكومة تزرع قمح وتحترم نفسها وتعمل أفران وتوصل العيش للبيوت.. والشباب عاطل بالجملة علي النواصي.
فلان: وحياة "النعمة" انت بتتكلم صح.
علان: انت ماسك الرغيف أبوشلن بتحلف عليه.
فلان: لا طبعاً. ده رغيف بنص جنيه عشان الدعوة تبقي مقبوله إن شاء الله!