لمؤاخذة!

فلان: هو لمؤاخذة سيادة اللوا الباشمهندس الباشا رئيس الحي شغلته إيه؟
علان: يوضب مكتبه ويبقي عنده طقم سكرتارية وعربية خصوصي وله حمام مستقل فيه صابونة بريحة ومعطر للجو وطابع كارت زي الفُل علي ورق جوافة.. فيه اسمه ومنصبه.
فلان: لا انت بتهزر!
علان: طيب قوللي انت يا جد أفندي هو سيادة رئيس الحي شغلته إيه؟
فلان: أنا ساكن في حلوان.. وبالصدفة غير السعيدة.. قدام رئاسة الحي خبط لزق.
علان: يعني بتشوف الباشا شخصياً يا بختك.
فلان: لا الباشا إيه.. ده حلم صعب المنال.
علان: امال بتشوف إيه؟
فلان: الزبالة اللي قدام رئاسة الحي أكوام أكوام.
علان: جايز سيادته هيعمل بيها مشروع استثماري!
فلان: بصراحة أنا اللي ناوي أعمل.
علان: تعمل إيه؟
فلان: اعمل تمثال من الزبالة نقدمه هدية متواضعة للباشا "الميت".. رئيس الحي!