قصة قصيرة

إهداء إلي أبي الذي رحل مع زوار الفجر يوم 25 يناير.. فعادت مصر ولم يعد!!
بابا جاي إمتي..؟
لما دفنت عيوني ف أحلامي.. شفتك في منامي
جسمك غايص في سرير تابوت..
وفاتح حضنك ليا.. نفسك تضمني موت..
فزيت.. لقيت ضلك بيوارب الباب
نطيت.. لمحت شعرك الأسود شاب
وجسمك بينط من الشباك.. وبيغطس ف لهيب الليل
حسيت بجسمي عليل.. ومفرهض مني..
مسيته.. كأنه شيطان جنني..
شايفك قدام عيني.. يتنظف كتابتك وترصها ع الحيط
وتسخن طبق الفول قبل ما تجبهولي علي الغيط
.. ولما هجموا علي بيتنا ودهسوه
وقصوا شعر بنتك بنوته وحرقوه..
ويا حرقة قلبي دفسوك ف البوكس..
وطاروا بيك ولاد الإيه.. للمجهول
نشفت ساعتها النار جوايا اللبن اللي ف صدري..
وسقطت من رأسي أحلامي وشعري..
لساني سامعة صوت بنتك بنوته بتشد الكرسي
جنب الحوض علشان تصب لك المية تتوضا..
وتنشف في جلبيتها النونو وهي بتغنلك وأنت بتحلق دقنك..
بابا جاي إمتي.. جاي ف ساعة ساكتة..!!
راكب ولا ماشي.. راكب بوكس الحتة..
جلده لحمة حمرا.. دمه ينزل قشطة..
وسعولوا السكة.. وابكوا سنين قدام