فلان : بقي لك ساعة ماسك الموبايل وعمال تقلب فيه يمين وشمال. علان : عايز أشوف فيه خدمة "البوس" الإلكتروني! فلان : قصدك الرسايل. علان : لا قصدي "البوسة".. "القبلة".. إيه ما تعرفهاش؟ فلان : أنت لازم بتحب جديد. علان : لا.. يا مراهق مش الحب اللي في دماغك أنا نفسي أبعث بوسة لراجل محترم اتعلمت منه درس عظيم في التسامح.. وعشان ترتاح.. أنا عايز "أبوس إيده". فلان : طيب ما تقابله وتبوس زي ما أنت عايز.. علان : مش عارف أوصل له. فلان : هو في بلد ثانية بعيدة. علان : لا.. هنا في مصر.. فلان : يا عم كفاية فوازير.. وفهمني إيه الحكاية. علان : سمعت الدكتور علي جمعة بيتكلم عن التسامح.. وضرورة العفو وأننا كلنا لازم نحب بعض عشان تبقي حياتنا حلوة وترجع لنا إنسانيتنا اللي وحشتنا قوي واحنا في عز الفوضي وضرب المثل بنفسه وقرر يتنازل عن كل القضايا اللي رفعها علي كل من شتمه أو أذاه. فلان : إن كان كده ناخد أسبوع أجازة أنا وأنت ونطلع نبوس الشيخ الطيب في الأزهر والشيخ جمعة في دار الإفتاء والبابا شنودة بمناسبة أعياد الإخوة الأقباط.