مسلم مسيحي في الوطن إخوان

مسلم مسيحي في الوطن اخوان
في ارض مصر بيزرعوا
تطلع عيدان قمح ودره وشامي و
فول وكمان كيزان
جرجس بيسهر علي الحدود واحمد ينام
ومحمدين ع السد واقف ليل نهار
واسحاق ومرقص يرضعوا من النيل سلام
دكتور عماد بن سليمان بيعالج ابني بخبرته
وبحنكته يدير المكان
ونصر راضي في الغيطان
بيوزع القمحات علي كل الجيران
لا ف يوم اكلنا لوحدنا
ولا يوم قطفنا قطننا
وحد منا مالوش مكان
ترحيله نطلع كلنا في الصف كوكتيل انسان
وعصير محبه في بقنا من يد مريم او حنان
وستنا العدرا تلامس وشنا
ترقي الولاد المسحورين م الجان
وابونا مرقص من كفوفه كلنا
بركة القداس كمان
في الخدمه ميري زيينا
اخضر لموني وبرتقان
وسلاحنا حب من الجدود
طالع مزرع للعنان
مين اللي قالك ياعم موسي
دالتخته دي نصين كمان
في تحية العلم الصباح حسك وحسي صولجان
بقطر بخرطوم المياه اطعم جبل برليف سيلان
والعم عبد العاطي صادلك ياصليب الدبابات كما الحمام
محمود دبح عجلين تقال
صمويل طبخ وعطيه شال
واحنا بنحفر في القنال
ومرات نجيب وانا عندهم في البيت
تجيب الميه دافيه في الشتا
ويوسف يصب اتوضا
اصلي عندهم
نتغدي حب الدرس اتعلمناه تمام
وشبعنا ضرب سيبك بقي قولة نسيج وخطب
ومانشيتات وندب
اسال هموم الكون تقولك
مين اللي شالها في عز غلب
دالحيطه شرك الارض ملك
والكل رافع وشه فوق عند السماء
يبقي اللي جاي يضرب فشنك
يعيش في ضنك يتغدي يفطر في الهوان