قصيدتان

بكلم حد مش موجود أصلاً‮ ‬
بفكر اكلم حد ف التليفون مش موجود اصلاً
واقوله نتقابل بكره ع القهوه
ونطلع ع القرافه نقرا الفاتحة لأيامنا الحلوة
وبعدين نتمشي شويه ع الكورنيش
لو قالي تعبت ح اشخط فيه
ولإنه مش موجود اصلاً‮ ‬مش هيقدر‮ ‬يقولي لأ
وهامارس عليه هواية الضغط المستمر
علشان أحقق كل رغباتي‮ ‬
وافضل اقوله كلام وحكايات عن الشعر
وبيتنا وعن حبي القديم
وعن احساسي دايماً‮ ‬بالعجز قدام أحلامي
وانا باصص ف عنيه وشايفه بيعيّط
بس مش عاوزه‮ ‬يقوم وياخدني بالحضن
ويطبطب عليّه
علشان لسه في عندي كلام عايز اقوله لحد
ويكون مش موجود اصلاً
ومعندوش أي ارتباط بالوقت لو اتأخر
ولا بخناقه مات فيها كام واحد
ولا فرح ف الشارع اللي ورانا
ولا بنت ماشيه ف رقة تفاصيلها الجميلة
هتشغله عني
واحد مش موجود اصلاً
ه اسند روحي علي كتفه
واطير بجسمي التقيل بعيد عن الارض
واقوله نتقابل بكره‮ ...‬
مرض وراثي
الشجرة دي
ح تطرح‮ ‬يوستفندي وبرتقان
ماتقلش ازاي
أنا مش مجنون ولا حاجة
بالأماره النهارده الاتنين وبكرة التلات
والضرب ف الميّت زي اللي‮ ‬ياكل لحْمُه
وحبي ليها مرض وراثي‮ ‬
بشكر كل اللي كان السبب فيه
وعلشان تسدّقني اكتر‮ ..‬
فاكر البنت اللي حلمت بيها‮ ‬
وقلت لها بحبك
وابوها لما قابلته الصبح‮ ‬
كانت رجليك بتضرب ف بعض‮ ‬
وخايف ليكون شافك امبارح ف الحلم
وجاي‮ ‬يعاتبك
أقولك كمان‮ ..‬
مش كان نفسك ف واد‮ ‬يشيل اسمك
وتطلّعه ظابط
ف تصوّره وهو لسّه عيّل‮ ..‬
لابس‮ ‬بدله ميري ومعلّق نياشين
وتسدّقه ف الصورة كإنه واقع
ومعندكش استعداد‮ ‬يتغيّر‮ ‬
رغم ان الحياه قاسيه ومالهاش كبير
وبتجيب العالي واطي‮ ..‬
بضربه واحده
وآدي انت شفت بعنيك
تلاتين سنه قهر واستبداد راحوا
وكإنه كان ومكنش
يعني انت مش مسدّق ان في شجره
ح تطرح‮ ‬يوستفندي وبرتقان
وتسدّق انه في شعب‮ ‬يقوم بثورتين
ف كام شهر ؟‮!‬
أيوه احنا‮ ..‬
إحنا الشعب اللي ف قاموسه المستحيل
حبة حروف‮ ..‬
دايمًا ف حالة خوف من بعض‮.‬