نقوش فرعونيّة

محتاج اضحك
ممكن اكتب كام اغنية كمان..
علشان ألاقيكي في ابياتها؟!
اصعب حاجة في الدنيا..
الحرب بس الحب كمان..
مش سهل
تعرفي اني لأول مرّة..
آخد بالي من رقة مناخيرك؟!
نظرة عينك شغلتني
.. عن كذا حاجة مهمة في عمري
وكتير اقلق م النوم
.. علي صوت تخبيط ع الباب
رغم إن انا متأكد إنك مش ممكن تيجي
بطلي تكدبي علي نفسك
ريحة الورد اللي بعته علي الواتساب
بيفكرني بآخر مرّه قابلتك
تفتكري صحيح إن احنا
غير كل شعوب العالم
وإن بلدنا غير سوريا.. وليبيا..
و نشرات الاخبار بتفكرني يوماتي..
بحادثة غرق العبارة..
لو قولت في مرّه إنك ملهمتي..
وبس ما تصدقينيش
الستات في حياتي سابو علي جدار الروح
.. رسومات باهته
.. الا انتي..
رسمك فرعوني
عارف إن النوع ده من الشعر..
مش بتحبيه..
لكن.. تفتكري
انا ممكن اسكر من شُرب الميّه
.. اللي مليتها من البانيو
.. اللي نقعتك فيه؟!