بالتحديد تقبل الله صيامكم

* أول الكلام.. "ألم تر كيف فعل ربك بأصحاب الفيل * ألم يجعل كيدهم في تضليل * وأرسل عليهم طيرا أبابيل * ترميهم بحجارة من سجيل * فجعلهم كعصف مأكول".
* إلي مجلس إدارة نادي الزمالك.. العام الدراسي الجديد.. قصدي الموسم الكروي الجديد قرب.. يا تري ح تعيدوا فتح المدرسة بقيادة المعلم في الأسبوع الأول ولا ايه رسونا علي بر.
* كان لازم محافظ الاسماعيلية السابق يتدخل في اللي مالوش فيه.. اهو فركش النادي.. ورحل.. وترك المشاكل للمحافظ الجديد.. ربنا يستر مش من المحافظ.. لكن من الأيدي الخفية اللي بتخرب في الاسماعيلي.. الحقوا الفريق.. بيضيع.. الفرق الشعبية مش ناقصة انهيار.. يا أبناء الاسماعيلية الشرفاء انقذوا ناديكم.. فهو من يسعدكم ولا تنسوا انه الأول الفائز ببطولات افريقيا 9 يناير 1970 وقدم جيلا من النجوم بل أجيال صالت وجالت في ملاعبنا بداية من المرحوم رضا وشحتة وخربوش والعربي والسقا واسامة خليل وحودة والسناري وهنداوي وأحمد بيومي وأنوس وميمي درويش وحسن درويش وسيد حامد وحسن مختار وأمين ابراهيم وبسطامي وسيد عبدالرازق بازوكا وعلي أبو جريشة وغيرهم.
* يا سلام علي الأهلي.. فعلا عارفين يسيروا بالمركب من نجاح إلي نجاح اللهم لا حسد.. من هنا تأتي البطولات.
* علي بركة الله يا شباب مصر في مونديال كولومبيا.. ثقوا في الله وفي أنفسكم انكم أفضل من أحفاد التانجو.. تمرون لدور الثمانية بمشيئة الله وبادائكم.. ودعوات ليس الوالدين ولكن الأمة المصرية كلها.. قولوا يا رب.
* مولودية الجزائر.. فيه سؤال لو تسمحوا.. هو كل هزيمة بتغيروا مدرب.. طب مستعجلين ليه.. استنوا بعد مباراة الأهلي الجمعة وغيروا علي مهلكم.
* يا أندية المنصورة والترسانة وأسوان الفرصة لسة قدامكم.. من غير ما تشتكوا للفيفا.. اتحادنا ناوي يصعد واحد منكم يا تري مين.. ايه رأيكم تيجوا نخمن ولا نقول علي طول.. أنا أقولكم.. ولا أحسن حد يزعل.. بكرة أقولكم.
* الكابتن سمير زاهر.. أخبار المدير الفني للمنتخب الأول ايه.. القرعة خلصت ومافيش أسهل من كده.. وعلي فكرة الأسهل ده.. هو المصيبة الكبري.. ولا نسيتوا النيجر وسيراليون.
* يا جماهير الأهلي الكروية.. مباراة المولودية الجزائري.. اجعلوها سهرة رمضانية في حب الأهلي.. وحب مصر وخلوها فرحة علي السحور تقبل الله صيامكم.
* آخر الكلام.. "خذ من أموالهم صدقة تطهرهم وتزكيهم بها" صدق الله العظيم