بأقلامهم حدوتة قبل الموت

يحكي أن.. كان هناك سفينة قبطانها ظالم ومستبد. وكان معه طاقم من اللصوص والعتاه. هبت عاصفة شديدة فتاهت السفينة في البحر ولم ير أحد بر الرحلة. اشتدت العاصفة واشتد معها ظلم القبطان. وكادت السفينة أن تغرق.. فثار الركاب وقاموا بإلقاء القبطان في البحر وتشاجر ركاب السفينة مع بقية الطاقم علي القيادة ونسوا العاصفة.. فغرقت السفينة.
قصة مؤثرة مش كدة؟! وعلي العموم انا بحكي القصة دي عشان ابن اختي كان في السفينة دي مش أكتر.. والسفينة مكنش اسمها السلام علي فكرة!
وطبعا دلوقتي بما أن كل الشعب المصري بيشتغل في السياسة وكل اثنين بيعملوا حركة وكل خمسة بيعملو ائتلاف. وكل عشرة بيعملوا حزب.. قررت ان انا كما أعمل ائتلاف. ومش ائتلاف عادي زي الائتلافات بتاعت اليومين دول ائتلاف شباب الثورة وشيوخ الثورة وليبراليين الثورة واشتراكيين الثورة. اخوان الثورة. ثورة الثورة وولد عم بنت خالة الثورة! ولا الحركة القومية لمحاربة الفساد والتدخين وأمنا الغولة وسلاحف النينجا لأ.
أنا قررت علشان حالة الفرقة دي أن عمل ائتلاف يضم كل تيارات الشعب وفيه.. انا وامثل المثقفين البرجوازيين والصاوي البواب ويمثل العمال والفلاحين واللواء نبيل من الدور الخامس بيمثل الشرطة والسلطة. هو صحيح لوا متقاعد بقاله عشرين سنة بس له كلمته برضه وقررنا نعمل ائتلاف.. عمارة اللؤلؤة مصطفي كامل!
طبعا انتم بتقلولي قبل ما أعمل ائتلاف انتم عايزيين تعرفوا تاريخي وعملت ايه في الثورة. وانا بقولكم بلاش نتكلم في امبارح وانا تاريخي معروف لكل الناس. أما الدعوات المغرضة اللي بتقول ان انا اول يوم نزلت فيه الشارع كان يوم التنحي أحب اقولهم ان انا نزلت اول يوم واتصبت برصاصة في شفيفي كانت مخلياني مش قادر انزل واهتف.. أما تاريخي في الائتلافات والحركات فبعد نجاح ائتلاف اطفال الثورة.. وبما أن عندنا ولنا الفخر. علي رأي البي بي سي أصغر ثورة في العالم قررت انا واصدقائي من حضانة سيدي جابر الخاصة.. اننا نعمل حركة ثوار في كاجي تو!.. وهي حركة هدفها سامي.. وانا مش قصدي حاجة باسم سامي دة.. لتقوله عليه عميل عايز يوقع بين الجيش والشعب ولا حاجة.. واحنا مش ناقصين عايزيين المقالة تعدي علي خير.. الحركة دي هدفها الدفاع عن اطفال الكاجي. من تهديدات البلطجية والدفاع عن زمزمية كل طفل مصري وحقه في الفسحة وسندوتش المربة! وطبعا لتاريخي النضالي الثوري والبطولي السياسي الطويل اللي حكيت لكم عنه كتير من المعجبين قرروا يعملوا لي علي الفيس بوك صفحة.. لترشيحي انا المناضل الداعية الليبرالي تصير حقوق العمال والطبقة الكادحة للرئاسة في دولة موزنبيق الصديقة! لأنهم خلاص شافوا ان مصر خلاص أي حد بيرشح نفسه للرئاسة فيها ود طبعا ميتناسبش مع تاريخي السياسي التغيري التانسيري والتنويري الثوري الطويييل.. قرروا ان احنا لازم نساعد الدول الصديقة والمجاورة في مشكلة مرشحي الرئاسة عندهم.. لأن المصريين دائما سباقون ومصر أم الدنيا ولازم تاخد بالها من عيلها!.
ومن غير ما اقول لحد حاجة شاف شوية معجبين تانيين يعملوا صفحة لتفويض السيد المحترم المخضرم المبجل للتكلم باسم كواكب المجموعة الشمسية ومجرة درب التبانة!.
ودلوقتي فرصة.. اللي مش هيلحق دلوقتي! مين عارف!!؟
الواحد مفروض يعمل حركات وائتلافات لأولاده وأحفاده احفاد احفاده وطبعا انا هاسيب الإيميل زي كل مرة تحت المقالة لو حد عايز يعمل لي صفحة ولا ينضم للصفحات بتعاتي وطبعا مش هنساكم لما تزوروني في قصري الرئاسي الموزنبيقي.