( الشيخ امين )

م الشوارع للشوارع ..
باندهك
تدهن وشى فرحة ..
و تدوب معايا
ف لون الحياة
نزرع غناوى العطشانين
لصدق العيون
اصل الخيانة ..
طبع البشر
وانا وانت مستنين ..
من زمان
للشيخ امين
يقرا المعوذة و تبت يدا
نلقى القلب ساعتها اهتدى
وفدادين الحزن صبحت براح
قبل الصباح
يرجع طابور المدرسة
و نشيد بلادى
و شوارع بتغسل وشها
من زفير الضباب
وقرش ف جيب المريلة ..
و فرحة اول يوم دراسة
و أبلة ناهد ..
و استاذ صلاح
فدادين الحزن تصبح براح
من ملايات السرير ..
اغزل علم
وادهن شوارع المدينة
بلون فرحتى
يدق الجرس
تطرح شوارع المدينة
مرايل
تحضنا الشوارع
لحد البيوت
تاخدنا الحكاوى
نكبر ف لحظة ..
نعجز نموت
منتصر سلطان محمد
اسوان