رباعيات جرة قلم : للشاعر محمد عبد الهادى

زهرة في عمر الربيع نادت شعاع الشمس
قالت كلام بشويش .. أقرب قوي للهمس
أنت الحياة والأمل ... مستنياك بُكره
ده لو نسيتني أموت ... ولا حد بيا يحس
جفّف دموع الألم ... خلي الأمل جواك
كسّر قيود الوهم ... بطّل تبص وراك
أيوه الدموع جايز تخفف ... يمكن
لكنها عمرها ما فتحت ... للأمل شباك
يا سين قوليلي السؤال .. عيدي وزيدي لي فيه
ولحد مالقى الجواب ... خليكي ماسكة إيديه
إمتى هايغلى ويعلى سعر البني آدم
ولا التمن في الحضيض ... ولا حد سمى عليه
شايفين وشاهدين وسامعين وساكتين
شهيد يوصل شهيد واحنا ولاحاسين
لكن ياغزة..يا قدس..يارام الله..يا يافا
صوت العرب لو مات..أنتم أكيد عايشين
حشرة ومحشورة .. في وسط كتاب
والعنكبوت رامي الخيوط .. والتراب
بقى كوم على غلافه .. ولما اشتكى
قالوا حبايبك راحوا .. واقفل عليهم باب