عطية: لو سعودية مكانتش تمت فى "الضلمة"

تعليقًا على التنازل عن "تيران" و"صنافير"

علق الفنان محمد عطية على دعوات النشطاء وبعض الصفحات للتظاهر غدًا "الجمعة" احتجاجًا على التنازل عن جزيرتي "تيران وصنافير" ل"السعودية" واصفًا ذلك ب"العار"، مؤكدًا أنه لو كان هناك شك أن الجزر سعودية لما تمت "الصفقة" فى "الضلمة" بحسب وصفه.
وكتب عطية عبر صفحته على موقع التواصل الاجتماعى "فيس بوك" موجهًا رسالته ل"الشباب": "بخصوص النزول يوم الجمعة.. أنا هقول كلام غير ملزم لحد ولا بعتبر نفسى أصلا مؤثر فى رأى حد ولا بتكلم عن لسان حد.. أنا أقل بكتير من كل ده، إحنا ممكن نختلف فى كل شىء حسب التوجه السياسى والفكرى.. لكن ما أعتقدش إن بينا حد مستعد يشوف بلده بتتباع ويسكت.. إحنا قدام مفترق طرق.. وحط فراسك كمصرى إن لو الموضوع فيه شك إن الجزر دى سعودية ولو واحد فى المليون ما كانتش الصفقة تمت فى الضلمة وبالطريقة المهينة لكل واحد بيحب البلد دى.. فى ناس ماتت وهى بتدافع عن الأرض دى.. الناس دول ليهم حق عليك.. حتى لو مافيش مواثيق.. دم جنودنا اللى سال على الأرض دى يقول إنها بتاعتنا".
وحذر: "الشباب إلى في سنى والجيل اللى أصغر منى وأحسن من جيلى.. أوعوا تسمحوا إن الإهانة دى تحصل فى جيلكو.. أوعوا تخلوا العار ده يتلزق لجيلنا.. انسوا خلافاتنا دلوقتى.. وأرجوكم ماتحبوش رئيس دولة أكتر من الوطن.. الخلاف أكبر من حكم عسكرى أو مدنى أو دينى أو سيسى أو غيره.. أو بمعنى أصح المفروض مايكونش فيه خلاف أصلا فى رفضك لبيع الوطن".
وأضاف عطية: "أنا عارف إن هدفع تمن كلامى شتايم وإهانات وممكن أكتر من كده.. بس أنا متحمل أى نتيجة.. على الأقل لو فشلت أبقى ماشفتش نكسة جديدة بتحصل وأنا واقف بتفرج.. لو الجزيرتين دول راحوا.. ماتلوموش السيسى ولا الدولة.. لوموا نفسكوا إنكم شفتوا ده بيحصل قدامكو وكنتوا واقفين تتفرجوا.. مرة تانية أنا لا بلزم حد بحاجة ولا هزايد على وطنية حد.. اللهم بلغت اللهم فأشهد".