بالفيديو.. ننفرد بنشر «المكالمة».. والجخ ينفي استدعاء الأمن له

أطلق الشاعر هشام الجخ أحدث قصائده على موقع "يوتيوب"، والتي تحمل عنوان "المكالمة" حيث تخطى عدد مشاهداتها ال100 ألف مشاهدة.
وخصّ "الجخ" بقصيدته الجديدة حفل مركز الفنون بمكتبة الإسكندرية حيث ألقاها خلاله مؤخراً، وهاجم "الجخ" فى قصيدته أنظمة حكمت علي مدار ثلاث سنوات، منذ ثورة يناير حتي الآن، قائلاً: ياعم يا بتاع الخطب يا عم يا بتاع السلاح/ هو إحنا يعني يا إما نبقي سداح مداح/ يا إما تطغوا وتفتروا/ بزيادة لينا تلات سنين بتبيعوا فينا وتشتروا".
وأكد الشاعر "هشام الجخ"، أن هناك شائعات كثيرة انتشرت عبر مواقع التواصل والقنوات الفضائية بعد إلقاءه قصيدة "المكالمة" في حفلته بالإسكندرية، وإنها عارية تماماً عن الحقيقة.
حيث كتب "الجخ" عبر صفحتة بموقع التواصل الإجتماعي "فيس بوك": "بعد قصيدة "المكالمة" سرت شائعات على مواقع التواصل الاجتماعي - وللأسف وصلت إلى الفضائيات والصحف - بشأن تأييدي لمرشحٍ بعينه دوناً عن بقية المرشحين.
يواصل: مصر كلها - حتى الآن - لا تعرف كل أسماء المرشحين لرئاسة الجمهورية .. وبالتالي فأنا لن أعلن دعمي ومساندتي لمرشحٍ دون الآخر حتى أرى كل المرشحين وبرامجهم الانتخابية ونناقشها في اجتماعات الرابطة – يقصد رابطة محبي الشاعر في الإسكندرية - ثم يكون القرار جماعيا".
وتابع: "بعد قصيدة "المكالمة" سرت شائعات بشأن استدعائي من قِبَل جهاز أمن الدولة واعتقالي وما شابه .. أؤكد لحضراتكم أن شيئا من هذا لم يحدث (حتى الآن)".
واستكمل: "بعد قصيدة "المكالمة" ..سرت شائعات بشأن تلميحي بالهجوم على شخص أحد الشعراء .. أؤكد لحضراتكم أن الشاعر الذي أقصده في القصيدة هو "أنا"، وأن هشام الجخ الذي عرفتموه يحترم شخوص كل الناس وإبداعاتهم ولا ينتقد إلا الحكام، وهو حق أصيل لكل مواطن ولن أتنازل عنه".
واختتم الجخ تدوينته قائلا: "بعد قصيدة "المكالمة" شعرتُ بأن حِملاً ثقيلا وأمانة كانتْ تؤرقني وقد أديتُها.
وينفي الجخ في قصيدته أن يكون تابعاً ي نظام مر على مصر خلال الثلاث سنوات الماضية ويقول: "أنا مش طرف/ فى خناقة الحكم اللى قفلت قلبكم/ أنا قلبى مؤمن إن مُلك الله بيهبه لمن يهب/ بس أوعوا تفتكروا إني هرضى بجوع عيالي/ أو إني أشوف بلدي قصادي بتتنهب".
ويختتم قصيدته ويقول: "أنا اللى كل ما أجوع بعنيكى بتصبر/ ما يغركيش العدد.. والله أنا أكتر/ أنا اللي مش إخوان.. ولا اللي مش عسكر".
وينفرد "محيط" بنشر نص القصيدة كاملة:
خلاص عرفت
عملوا ثورة وشالوا زفت
بس متقوليش خلاص مشوا حمار
أي واحد بعده هنخليه حمار
حتى لو مكنش اسمه حمار
شعب مين يا جحش انت ؟
هي مصر امتى حكمها شعب ؟؟
مصر بتسلم ودانها لأي كلب .. بس يتذوق شوية
شرعية ديمقراطية ليبرالية عسكرية أى كلمة فيها "ئية"
أى كلمة تكون طرية
الشباب المصرى منظر.. كله فاكر نفسه عنتر
انفخوهم انتوا بس وعظموهم
فهموهم أن رأيه ده أمانة
وإن أي كلام يخالف رأيه
يبقى بدأت الخيانة
وافردوا اديكم شوية بالفلوس
الناس جعانة
فنانين ومثقفين دول عند خالتك
دول شحاتين
ياابنى كله قصاد فلوسك راح يدوس
فيه ولد شاعر كويس
شفته مرة بيشتم الريس
طلعوا الولد ده في الإعلام كتير
الولد شعبيته عالية وصوته عالي
اشتروه حتى لو كان سعره غالي..اشتروه
هاتوا رجله واحدة واحدة وبالطريقة
واكسروا عينه وودانه
بس هو يحس بينا
خلوه كده مصدق دماغه
ادوه فلوس..ادوه كتير
واحدة واحدة هايبقى واحد م الحمير
والحمير واقفين طابور
واحنا مالناش أي دور
احنا بس يا دوب بنديهم فلوس
بس احنا مش على المسرح يا بابا
احنا فين..في الكالوس
هما ها يأدوا الوظيفة فرد فرد
احنا ها نجيب الديكور
احنا ها نضبط اضاءة
يبقى عرض
هي ثورة وهما شعب
ياكلوا بعض
أما أحلامك أحلى نسمة وأحلى بلسم
وحلني على بال ما حد يفوق ويفهم
***
ليه يا شيخنا
طب ها نعمل ايه يا شيخنا
طول ما هو الإعلام سالخنا
واحنا برضو يعني لسه مسيطرين
طول ما الناس جعانة ومطحونين..احنا لسه مسيطرين
الجوع جهالة..والجهل جوع
والجوامع تحت ايدنا في البلاد والنجوع
الناس ها تفهم ليبرالية وماركسية؟
الناس ها تفهم إسلامية
الغلابة في القرى مالهمش خُلق في الحوار
دول ناس غلابة
يا إما جنة يا إما نار
واحنا طبعا طرح جنة
هي الناس ها تاخد دينها عنهم والا عنا
احنا اللي بنقول حرام واحنا اللي بنقول حلال
واحنا اللي هانسوقهم يمين واحنا اللي هانسوقهم شمال
الفنانين إن كان ممثل والا مطرب والا شاعر
اللي يناصرنا ها نمدحه بالخير ونذكر اسمه ع المنابر
واللي يعادينا ياكش ما يكون شيخ بعمة
ها نقول ده فاجر والا كافر
والناس بتمشي ورا الخطب
والجهل ناره "جايدة جايدة"
احنا بس يادوب ها نرمي له الحطب
***
تمام يا فندم
كله متضبط ومتشيك ومتهندم يا فندم
هو بعد الناس ما شافت
حد ليه وش يتكلم يا فندم
طبعا الإعلام بتاعنا وطني حر
احنا بس خايفين نفتح الباب للعيال
لا الخيط يكر
يعني دي سحابة صيف يا فندم
ها تاخد وقتها ويا دوب تمر
الرموز الإعلامية
بصراحة مية مية
وهي دي الديمقراطية
احنا مامنعناش مذيع
يطلع في أي قناة ينقد ولا يشتم
هات سعادتك اسم واحد
احنا بنقفل القنوات يا فندم
الشعب منحاز لينا طبعا
بالتمام فنانين ومثقفين ومطربين مفيش كلام
أيوه طبعاً غنوا لينا
أيوه غنوا لمصر يعني طبعاً غنوا لينا
قالوا ايه..قالوا ايه
"مصر ياامه يا سفينة"
مصر عايمة في بحر هايج واحنا ربان السفينة
"تسلم الإيد اللي ربت"
احنا مش فاضيين يا فندم للأغاني والكلام
الكلاب هي اللي فاضية للنباح
اما احنا بتوع سلاح
***
أنا ماية من طينك يا بلدي
انا مش معاهم كلهم
ولا انيش تبعهم كلهم
انا جاي لوحدي
لساني فاكر مشية الكورنيش وايدك
وحشني رمضان والفطور علي صوت أدان رفعت
وعيدك..
وسط البلد وحشتني
من غير الحواجز والحجارة
أنا كنت زمان بمشي
ماكنتش أعرف إن في الشارع وزارة
كنت بتحامي في عنيكي
وبإيد حبيبتي وبالسيجارة
كنت بتدفا اما بركب ميكروباص
عملت كل حاجة تزعلك
لكني ما ضربتش رصاص
وسط البلد نسيت صوابعي اللي اتهروا
وسجايري الفرط وهدومي اللي دابوا واتبروا
ياعم يا بتاع الخطب يا عم يا بتاع السلاح
هو إحنا يعني يا إما نبقي سداح مداح
يا إما تطغوا وتفتروا
بزيادة لينا تلات سنين بتبيعوا فينا وتشتروا
إحنا البلد.. إحنا السند والمستند
إحنا إللي قبل ما تبني سدّك.. كنا سدّ
وإحنا إللي علشان القنال كانت ضهورنا بتتجلد
إحنا البلد، ملعون أبو اللي ما داقش جوعي
وإن كنت مش هاصعب عليه
والله ما هاوريه دموعي
أنا أقوي منكم
أنا جدري ضارب في البلد دي..غصب عنكم
يا عم يا بتاع السلاح، يا عم يا بتاع الخطب
تركتكم أصلاً نخل شاخ ..ولا عادش بينزّل رطب
أنا مش طرف
فى خناقة الحكم اللى قفلت قلبكم
أنا قلبى مؤمن إن مُلك الله بيهبه لمن يهب
بس أوعوا تفتكروا إني هرضى بجوع عيالي
أو إني أشوف بلدي قصادي بتتنهب
والله معمول لك عمل
شعب اتنحس على نحس همي
شعب اتوقف على حرق دمي
ادب ايدي في غيط شعور
عشمان اطول بدر البدور
يطلع لي شال أمي
لو حد زعلان اني ثرت
اديني غرت
بطلت ثورة وبطلت نيلة
وشلت على راسي التقيلة
مالناش يا عم نصيب نفرح بخلفتنا
ماهو يا ترضى بالمركوب.. يا ترضى بالفتنة
يادوب شافوني عريس
نصبوا الطريق متاريس وحاصروا زفتنا
هانداري ليه ونلف
ونداري في الألاعيب
الاعتراف مش عيب
لو كنا شفنا الغيب
لا كنا ثورنا ولا كنا اتزفتنا
صعبان عليا الحلم
شايفه بيتكسر
وعنيا طايلة المدد.. بس الإيدين أقصر
أنا اللي عمره ما غاب وعمره ما اتأخر
تطرح عنيكي عذاب يزرع عينيه سكر
أنا اللى قال حاضر ولا شرط ولا اتأمر
ولا طمع ولا إدّانا ولا بطش ولا اتجبّر
أنا اللى كل ما أجوع بعنيكى بتصبر
ما يغركيش العدد.. والله أنا أكتر
أنا اللي مش إخوان.. ولا اللي مش عسكر