نداء استغاثة من أسر معتقلي "رمسيس الثالثة"

وجهت أسر 64 من المعتقلين في قضية أحداث الأزبكية 6 أكتوبر 2013، المعروفة إعلاميا ب"رمسيس الثالثة"، نداء استغاثة، بعد الحكم الصادر بحق ذويهم بالسجن 15 عاما مشددا و5 أعوام مراقبة، في جلسة النقض يوم 9 مارس الجاري.
وجاء نص بيان الاستغاثة، والذي اطلعت عليه "المصريون":
استغاثة من أسر 64 مواطنا تم تثبيت الحكم عليهم ب15عاما مشدد و5 أعوام مراقبة في جلسة النقض يوم 9 مارس 2016 (قضية أحداث الأزبكية 6 أكتوبر 2013 - رمسيس الثالثة).
وقالت إحدى ذوي المعتقلين في تلك القضية:
لم يكن من المتوقع أن يرفض النقض المقدم من ذوي المعتقلين في قضية "أحداث الأزبكية 6 أكتوبر 2013 - رمسيس الثالثة"، حيث إن تلك القضية متهم فيها شباب وشيوخ دمرت حياتهم بعد الاعتقال، من الأمثلة دى والدى/ محمد مصطفى الجندى، بابا مريض ضغط وعنده نقص في سيولة الدم وقصور في الأوعية الدموية وعنده تاريخ مرضى 3 جلطات في رجله الشمال ومهدد بفقد الرجل دى لو حصل فيها أي جلطة تانى، وجلطة في المخ وعنده تلف في ثلث الرئة الشمال بسبب جلطة، وحاولنا كل المحاولات عشان يطلع بعفو صحى وقدمنا الطلب كذا مرة وكل مرة كان بيترفض.
أخويا/ عبدالرحمن محمد الجندى، عبدالرحمن اعتقل وهو عنده 17 سنة يعنى كان لسه قاصر ساعتها بس من البداية اتعامل معاملة الكبار، عبدالرحمن دلوقتى عنده 20 سنة، عبدالرحمن لو كمل ال15 سنة هيطلع عنده 33 سنة، يعنى كل الجزء من حياته اللى ممكن يحقق فيه حاجة هيكون راح خلاص، عبدالرحمن كان متسجل في الجامعة الألمانية GUC ووافقوله على season drop في أول semester بس وبعد كده اترفض وبعد الحكم عليه ب15 سنة تم فصله من الجامعة ودلوقتى هو متسجل في جامعة عين شمس - كلية الهندسة بيذاكر وبيمتحن والحمد لله نجح في إعدادى هندسة بس بطلوع الروح وبعد ما عملنا كذا تظلم على درجاته اللى هو كان متأكد إنها حقه، نجحوه وهو دلوقتى في أولى ميكانيكا بس في تعنت شديد معاه ورافضين تماما يدوه أي درجات من أعمال السنة أو العملى وكمان اكتشفنا إنهم كانوا بيحسبوا عليه عدم الحضور، وبنسعى دلوقتى في محاولات مريرة لحل الموضوع ده لأن درجات التحريرى حتى لو جاب الدرجة النهائية في كل الامتحانات من غير أعمال السنة والعملى متنجحهوش.
عبدالرحمن فقد إنجازات كتيرة قعد 17 سنة بيكوّنها وبيتعب عشان يوصلها، فقد رياضته اللى بيحبها واللى كانت جزء كبير من حياته وفقد التعب اللى تعبه سنين في المذاكرة عشان يوصل للى هو عايزه وفي الآخر يتسلب منه في لحظة بسبب ظلم أعمى وعدم منطقية غريبة.
عبدالرحمن اعتقاله أفقده الجزء اللى حققه من أحلامه وبيفقده كل أحلامه اللى كان في طريقه لتحقيقها.
القضية دى فيها 64 إنسان بقصص مختلفة عن ازاى حياتهم اتحولت تماما بعد اعتقالهم وعن الحاجات اللى فقدوها، منهم اللى ماتت بنته اللى عندها 10 سنين بمرض السرطان في المخ ومقدرش يشوفها ويبوسها لآخر مرة قبل دفنها ومنهم اللى أبوه مات ومقدرش يشوفه أو يدفنه أو ياخد عزائه، ومنهم احنا لأن جدتى في العناية المركزة في غيبوبة بسبب نزيف حاد في المخ ومكانش عندها غير أمنية واحدة بس قبل فقدها الوعىإ. انها تشوف ابنها (والدى) وحفيدها (أخى) برة السجن ومكانش فيه على لسانها حاجة غير "يا رب ابنى يخرج قبل ما أموت وهو اللى يدفني بنفسه".