سامية جاهين تكتب: أطهر ما فينا «أحياء بالاسم فقط»

طُلب منى أكتب عن الثورة وعن اللحظة اللى إحنا فيها دلوقتى وعن أخطائنا وإزاى نصلحها ونقاط ضعفنا وإزاى نشتغل عليها. وأنا كإنسانة فقدت حتة منها فى كل مرة سقط فيها شهيد وما حققناش حلمه ولا جبناش حقه باسأل نفسى: هل كانت المكاسب بقدر التضحيات؟ أكيد لأ. هل كان فى الإمكان أبدع مما كان؟ ما عنديش إجابة قاطعة.لكن اللى متأكدة منه هو إن «كل شعب وتضحياته، تصنعه وتصنع حياته» وإن حق الناس فى العيش والحرية والعدالة والكرامة غالى قوى ومش حيقدر ينتزعه إلا يقدر على ثمنه.
وبما أن الأوضاع مقلوبة والحقايق ضايعة، أفضّل إنى أستخدم المساحة دى عشان أفتكر معاكم كنا عايزين إيه ووضعنا دلوقتى إيه، لعله يفيد فى إننا نقدر نشوف نفسنا واللحظة اللى إحنا فيها بشكل أوضح.
يوم ما نزلت مع الناس للمطالبة بإسقاط النظام، وهتفنا «عيش، حرية، عدالة اجتماعية»، كنا شايفين إن النظام ده ماصص دم البلد لصالح مجموعة تربطها شبكة مصالح فاسدة، مكوّشة على كل موارده، وسايبة الأغلبية تعانى من البطالة والفقر والجهل والمرض، ومن الذل والبطش والتنكيل اللى بتمارسه ضدها الأجهزة الأمنية المطلوقة عليهم لإسكات أى شبهة احتجاج على الظلم.
لما طالبنا بمحاكمة قتلة خالد سعيد وسيد بلال وبعدهم عصام عطا والشيخ عماد عفت ومينا دانيال وكل شهداء الوطن، ولما طلبنا الحرية للمظلومين ورفضنا تعذيبهم فى السجون، ورفضنا المحاكمات العسكرية للمدنيين، ودافعنا عن حق كل مواطن فى محاكمة عادلة أمام قاضيه الطبيعى كنا عايزين عدالة للجميع بلا استثناء، ولم نتوقف عند انتماء هذا أو ذاك ولا توجهاته السياسية ولا مستواه الاجتماعى.
لما رفضنا تكميم الأفواه كنا نقصد الكل، حتى اللى بيشتمنا ويشوهنا لغرض أو آخر لأننا مؤمنين بحرية الرأى وحرية التعبير عنه للجميع.
النهارده ثورة يناير بيعتبروها مؤامرة، واللى شارك فيها خونة ونكسجية، وأجهزة قمع نظام مبارك شغالة بطاقتها القصوى، ورجال نظام مبارك متصدرين المشهد بقوة بشخصهم وكمان بفكرهم وسياساتهم.النهارده عندنا أرقام بتتكلم عن أكتر من 2500 شهيد و15 ألف مصاب و20 ألف معتقل فى الست شهور الأخيرة، وعندنا قنوات بتتقفل وإعلاميين محترمين بيقعدوا فى بيوتهم وبرامج بتتمنع، لأنها مش على مزاج السلطة، وعندنا شباب بيتلموا من على القهاوى وهما بيتكلموا فى السياسة زى طلبة الأزهر فى القضية اللى اشتهرت بقضية «معتقلى القهوة»، وعندنا بنات وسيدات زى أمانى حسن اللى اعتقلت فى أحداث رمسيس، وأصيبت بشلل بسبب التعذيب، وعندنا آمنة ياسر الطالبة اللى اتقبض عليها وهى خارجة من امتحان فى جامعة الأزهر، واتعمل لها كشف حمل زى اللى بيتعمل لبتوع الدعارة عشان يكسروها، وناهد بيبو اللى بقالها أكثر من سنتين فى السجن هى والشباب الجدعان اللى نزلوا يتضامنوا مع القضاة المعتصمين فى 2012. وعلاء عبدالفتاح اللى اتقبض عليه من بيته واتضرب هو مراته عشان طلبوا يشوفوا إذن النيابة ولسه بعد شهرين من حبسه ما اتحددتش جلسة لقضيته، وأحمد عبدالرحمن ودومة وماهر ومحمد عادل ومندور وغيرهم. دى مجرد أمثلة لأنه يستحيل ذكر كل الناس وكل التفاصيل. أما عن القبض العشوائى والاستعباط والتلكيك فحدث ولا حرج: رفع شعار مش على مزاجهم أو صورة على موبايلك أو على بلونة أو مسطرة ممكن يدخلك السجن!
أما أطهر وأجدع من فينا زى الشهيد محمود عبدالحكيم مثلا اللى كان بينزل للناس يشوف مطالبهم، ويحاول يساعدهم يناضلوا من أجلها مع مجموعة «أحياء بالاسم فقط» نزل فى ذكرى محمد محمود يطالب بالقصاص للشهداء، فاستشهد هو كمان برصاص نفس القاتل. والشهيد محمد رضا اللى قُتل داخل كلية هندسة بالرصاص «اللى بيلسع» وشهود العيان شافوا العسكرى مصوب البندقية باتجاهه، تم اتهام أصدقائه اللى كانوا واقفين جنبه بقتله! وجهازالداخلية لم يتم تطهيره، ولم تتم محاسبة قتلة الشهداء من الضباط منذ 25 يناير لليوم. تفتكروا سلطة بتعمل كل ده ممكن تقيم دولة العدل والحرية وإحنا اللى مش وش نعمة؟
أنا عارفة إن أغلبنا مرهقين ومحبطين وحتة من روحنا اتكسرت فى التلات سنين اللى فاتوا. طريقنا صعب وطويل ومؤلم، لكننا فى الحقيقة لا نملك إلا الاستمرار فيه لأن نفس الأسباب اللى ثُرنا علشانها فى يناير 2011 لسه حاصلة وأكثر.
تعبنا؟ أيوة تعبنا. بتعدى علينا لحظات يأس وفقدان أمل؟ طبعا. لكننا لسه مؤمنين بمطالبناالمشروعة اللى مش كتير علينا وعلى بلدنا. وحنفضل نعافر، ونحارب، ونناضل علشان نحققها. واللى يتعب مننا يريح على جنب وما يعطلش غيره اللى لسه قادر يكمل. الكرامة والعيش والعدل والحرية حقنا اللى دفعنا ولسه بندفع تمنهم، ومش حنبطل نطالب بيهم لأن «الحق اللى وراه مُطالب ما بيموتش».
* عضو مؤسس بفريق «اسكندريلا» الغنائى