أكد أحمد الميرغنى لاعب وسط فريق وادى دجلة سابقًا، أن هناك عددا من وكلاء اللاعبين تحدثوا معه، بشأن انتقاله إلى عدد من النوادي، ولكن عندما يصل الأمر إلى الإدارات يتوقف الموضوع فجأة، وذلك بسبب انتقادى رئيس الجمهورية. وقال الميرغنى فى تدوينة له بموقع التواصل الاجتماعى "فيس بوك": "ناس كتير الفترة الأخيرة بتسألنى عملت ايه وروحت نادى إيه وكدة وأنا مكنتش برد عليهم علشان أنا لغاية دلوقتى معملتش أى حاجة ومروحتش أى نادى ومكنتش برد علشان مش عارف أقول إيه وكمان مكسوف أقول إنى لغاية دلوقتى مروحتش نادي". وأضاف: "الحكاية إن فيه وكلاء لاعبين كلمونى وكل وكيل يقولى على نادى شكل ده غير إن وكيلى برضه كان بيقولى إنه اتكلم مع كام مدير فنى للأندية وكلهم قالوله معندناش مشكلة بس مع كل الأندية دى الموضوع كان بيوصل لمجالس الإدارات ويوقف والموضوع بيفشل الله أعلم ليه بالظبط بس ممكن علشان أنا انتقدت رئيس الجمهورية وكله خايف لما أروح النادى بتاعه يقولوا عليه إنه مع كلامى وإنه ضد النظام والهبل ده، رغم إن الأستاذ وائل الإبراشى كان قال فى البرنامج إن رئاسة الجمهورية كلموه وقالوا إن ده حق اللاعب إنه يقول رأيه!! دى كل الحكاية ببساطة". وتابع: "أما بقى الناس اللى سألتنى ناوى تعمل إيه فأنا مفيش قدامى حلول، لو مروحتش نادى فى مصر هشوف لو جالى عرض كويس يستاهل الغربة هسافر لو مفيش يبقى أنا كده مش هيبقى فى حل قدامى غير إنى هبطل كورة". وعلق الناشط الحقوقى نجاد البرعى على هذه التدوينة، قائلًا: "أحمد الميرغنى فى طريقه إلى الاعتزال! ”قال كلمة ويبدو أنه سيدفع ثمنا لم يكن يتخيله".