(إفطار بطعم العامية).. مسلسلات رمضان للكبار فقط!

شهر رمضان شهر كريم فعلا نفحات ربنا والخير والصلاة والذكر والتراويح كلها شعائر دينية تمس الروح والقلب، تخليك تستشعر حلاوة رمضان بجد.. بس العجب كل العجب اللى بقينا نشوفه فى مسلسلات رمضان دلوقتي.. أقولك إيه ولا إيه يا جدع؟! ده هم ما يتلم تقولوش حالفين ليفطرونا؟!
المسلسلات بقت سبوبة اتلغى منها الهدف والرسالة، وبما أنها بقت سبوبة، بقوا يدونا فى "الهايفة" لا ويدولها أكبر أجر.. "هيافة" فى رمضان يا ظالمة!!
دا إحنا لو كفرة مش هتعملوا فينا كده، الله يرحم زمان وأيام زمان ويرحمك يا أستاذ "مجدى أبوعميرة" كان المسلسل وقتها فن على حق ربنا "المسلسل يعنى رسالة"، لكن دلوقتى المسلسلات مبتعملش حاجة غير أنها تشوه صورة مجتمعنا، ما شاء الله عليهم مطلعينا يا رقاصين يا بتوع مخدرات يا بنموت فى الحرام، خليتوا مصر قدام العالم عبارة عن كومة فساد.. والله حرام اللى بيحصل ده، المسلسلات بقت أكتر من الإعلانات لدرجة أن من كتر المسلسلات مبقاش عندهم وقت يذيعوا التترات كلها ورا بعضها، والجدع يفهم إنهم بدأوا مسلسل جديد!!! يعنى حضرتك صيامك ضايع ضايع، أما الوقت فحدث ولا حرج مش موجود أصلا، هتخرج من "الهيافة" هتوقع فى "الأم المثالية"! طيب سؤال وأنا راضية ذمتك.. ليه الكم الهائل ده من المسلسلات؟ ؟!!!مش حرام الفلوس اللى بتروح على الفاضى ديه غير الذنوب اللى بالكيلو كمان؟! والمدهش فى الموضوع ده بصرف النظر عن التكلفة والديكور والصرف الواضح أن المنتجين فلوسهم مش مقضية لبس الممثلات، الواحدة من دول تلاقى فى حاجة ناقصة فى هدومها " كتف واقع، بنطلون مقطوع"، متقلقيش عارفين أنك مش قاصدة وإن أكيد العيب فى المنتج مصرفش كويس، ولاّ نكون ظلمناه وهو صارف ومكلف! وأنت اللى من كتر الضغط عليكى نسيتى تكملى لبسك قبل ما تطلعى على الكاميرا؟!.. أستغفر الله العظيم .. عيب بقا.. ربنا يكون فى عونهم بيتعبوا برضو.. ورمضان كريم وصوما مقبولا معرفش إزااااااي؟!!!