حدوتة حب بتعيشها

من و إحنا صغيرين و إحنا بنشوف في الأفلام حدوتة الحب الأول....أول كلمة بحبك....أول مرة قلبك يدق و تحس إنه هيطير من الفرحة....أول مرة تتعلق بحد و تحلم تكمل عمرك معاه.....أول مرة تسيب نفسك و تستأمن حد عليها....أول مرة تحس إن حد بيوحشك و بتحس بغيابه أول ما يبعد عنك.....أول مرة تحس إنك
متلخبط....فرحان و خايف و مرتبك و قلبك بيدق كله في وقت واحد.....أول مرة تحس إنك خايف علي حد و هو كمان خايف عليك....أول مرة تحس إنك لقيت في حياتك الشخص اللي هتخاف انك تخسره.....
فالحب الأول هو أول مرة في كل مشاعر حلوة هتشقلب كيانك....و يا إما المشاعر الحلوة دي هي اللي هتفضل مالكاك....يا إما هتأتي الرياح بما لا تشتهي السفن ...
طيب نكلم في المهم شوية...هما ليه ديما بيقولوا عالحب الأول أحلي حب ؟؟ و ليه ديما الناس مقتنعة إنها مش هتعيش قصة حب زي الحب الأول؟؟ و ليه ديما بنقول يا بخته اللي كمل حياته مع حبه الأول؟؟
الحقيقة إن اللي بيخلي الحب الأول الأجمل ديما في عيوننا هو كونه أول مرة قلبنا يحس بالمشاعر دي....أول مرة يحلم و يصدق حلمه....فكرة الأول مرة دي عامة بتخلينا مندفعين أوي....مش عارفين نتحكم في نفسنا...و لا مشاعرنا.....بنسيب نفسنا بزيادة....فإندفاعنا ده أو خروجنا عن المعتاد و إننا بنهرب من الواقع لنعيش في عالم الخيال ده بيبقي شيء محبب جدا بالنسبة لنا....و بيخلي الحب ده في عيوننا هو الأجمل مهما أثبت الواقع غير ذلك...
طب هل فعلا الحب الأول هو الأجمل ؟؟ و لا إحنا اللي فاكرين كدة بس ؟؟
الحقيقة إن مفيش إجابة نموذجية....مقدرش أقول إنه ديما الأجمل....و مقدرش أقول إنه ديما مبيكملش....الموضوع ده ملوش قاعدة....فيه حب أول بيبقي الأخير....و فيه حب أول بيتحول لمجرد ذكري....مش إحنا اللي متحكمين في الموضوع ده....الموضوع ده بيبقي قدري...يعني ساعات ربنا بيخليك تعيش حدوتة الحب الأول و متكملش....مش عشان يوجع قلبك....لأ عشان عايز يعلمك و يقويك و يعوضك بعد كدة أحسن منه مليون مرة....و ساعات بيخليك تعيشها و تكمل من أول مرة....بس مش معني كدة إن الحدوتة اللي مكملتش لازم تفضل في عيوننا الأجمل مهما كان تعويض ربنا بعد كدة كبير....و لا معني كدة إنها لازم تفضل عقدة في حياتنا مهما اللي اتعلمناه منها كان كتير...
الموضوع و ما فيه إن مفيش قاعدة تخلينا نقول إن الحب الأول هو أجمل حب....و لا فيه قاعدة تخلينا نوقف حياتنا عالحب الأول حتي لو فشل....الحب الأول هو مجرد تجربة.....زيها زي أي تجربة....الفرق الوحيد اللي بيميزها إن نتيجتها في نظرنا و نظر الناس بتبقي عاملة زي نتيجة الثانوية العامة....لو نجحت و جبت مجموع بتبقي الواد الجدع اللي عرف ينشن من أول مرة....و لو سقط....بتبقي في موضع شفقة للناس و كل أما يعرفوا حكايتك يقولوا يا حرااام....
بس المشكلة إننا لسة معتقدين إن اللي بيكمل في حبه الأول هو بس اللي هيبقي مبسوط....و إن مفيش حب بعد الحب الأول....لأ فيه....و فيه حب عاشر بيبقي أنجح من الحب الأول.....و فيه واحدة بتتجوز عن إعجاب بس و حياتها بتبقي أسعد من مليون واحدة إتجوزت حبها الأول.....إحنا اللي حاطيين القاعدة....و إحنا اللي تاعبين نفسنا بيها....مع إنها تجربة... مجرد تجربة....و فشلها أو نجاحها بأيدين ربنا و بس...

لكن خليك متأكد أن مع كل فشل حدوتة حب بتعيشها....هتلاقي تعويض ربنا ليك كبير....و خليك واثق إن لو حبك الأول فشل دي مش نهاية الطريق....أدي نفسك فرصة....و عيش من تاني...و هتقابل اللي ينسيك حبك الأول....و يبقي بالنسبة لك أجمل من مليون حدوتة حب أول عيشناها و شاء القدر إنها متكملش !!!