جَلّ من لا يسهو.. يا جماعة حصل خير وكلنا بننسى، ومن كان منكم بلا خطيئة فليرمه بحجر، الراجل بسم الله ما شاء الله داخل في عامه ال84، حرام يعني لما ينسى 474 مليون دولار في حساب جوه بنك في آخر الدنيا.. سويسرا بعيدة أوي يا اخوانا يمكن على ما راح «اودعهم» ورجع كان نسي. طب بلاش دي.. معقول حتكدّبوا الرئيس المسلم اللي كنا بنشوفه بيصلي كل جمعة، بطل الحرب والسلام، وصاحب الضربة الجوية، اللي عرفناه واخترناه وعاشرناه 30 سنة واكتر، وتصدقوا واحد لا من دينا ولا عربي زيِّنا، ده حتى ما قالش اسمه ايه حياللّه ناطق باسم الخارجية السويسرية، يعني تكدبوا رئيس – حتى لو سابق ولا مخلوع ولا «متخلي» – وتصدقوا واحد مَحَصلّش حتى وزير، ويمكن يطلع عَلماني، ولا شيوعي، ولا حتى «تروتسكي»! والعياذ بالله! تصدقوا انكم شعب مفتري، وما يتمرش فيه، وكمان ما يستهلش قائد عظيم زي مبارك يحكمه، واخرتها تبهدلوه كده، وتخلوه قاعد في شرم الشيخ في مستشفى 5 نجوم يا حرام.. يا مفتريين يا ظَلَمْة.. يا وحشين. ولأن داء النسيان متفشي على ما يبدو في المحيطين بفخامة الرئيس النَسَّاي، وربما كان احد الاعراض الجانبية لكثرة شرب المياه المعدنية المستوردة من سويسرا وفرنسا، اللي كانوا ولاد الإيه «بيأربعوها» – أي يعبونها عبا لمن لا يجيد اللهجة المصرية –فقد نسي أبو القوانين وعم الدساتير وترزي الاستفتاءات، اللي القانون لعبته، السيد فتحي سرور، الشهير بسيد قراره، نسي انه يملك قصرا في أوروبا، وعندما تم التحقيق مع سيادته، سأله رئيس النيابة اذا كان له أي ممتلكات خارج مصر، فأجاب شامخا: طبعا لأ.. فاخرج رئيس النيابة ورقة وقرأ منها ما يثبت امتلاك سيد افندي قراره لقصر في أوروبا، فارتبك وتلعثم وتهدج صوته وسأل محاميه: أقول ايه؟.. فأجابه سعادة المستشار القانوني قول ما عرفش.. أو نسيت؟! بصراحة الناس دي لازم تصعب علينا، يا حرام من كتر الهموم اللي الشعب حاططها على نافوخهم، هي دماغتهم دي هتشيل ايه ولا ايه دا كويس انهم فاكرين اساميهم يا عالم يا ظَلَمة، حاكم إحنا شعب همومه كتيرة أوي.. أوي.. دا احنا لما بنوصف حاجة بانها كتيرة اوي بنقول «اكتر م الهم ع القلب».. بذمتك يا صديقي سعود الورع – المذيع الكويتي الذي يبكي كل يوم في قناة سكوب على مبارك – بذمتك عمرك سمعت أي شعب في الدنيا بيقول «كتير أوي.. اكتر من الهم ع القلب» غير المصريين.. روح يا شيخ الهي يرزقك ب... ولا بلاش، علشان قلبك مش هيستحمل اللي استحملناه. حسام فتحي [email protected] twitter@hossamfathy66 يا كلمتين في الحشايا فاتح ضلوعي كتاب دافي وصافي النوايا ما يحبش الكدّاب موالي سهران معايا بيئن للمساكين بيقول دا أصل الحكايا الحق ع البواب! مختار عيسى (رباعيات الحوام)