وجع القلب.. ثورة القطط !

"وخير اللهم اجعله خييير، رأيت فيما يري النائم...أني سافرت لبلد عجيبة نص شعبها محبوس، والنص التاني بياكل كفتة!
والغريب ان حكومة البلد ديه كلهم "منقلبين" رجليهم فوق وراسهم تحت، مدفونة في قلب الرمل!! وكل ما يخرجوا راسهم من الرمال، يلاقوا البلد لونها "أصفر" وعربياتهم مولعة!، ووزيرة من عندهم بتهش القطة! يرجعوا بسرعة يدفنوها تااااني...
ولما القطط زهقت واتخنقت من الوزيرة اللي شغالة هش ، عملوا ثورة القطط وهشوا الحكومة كلها!..رئيس حكومة البلد العجيب كان أصلا خارج من القبر بكفالة علشان يعمل "بلاااااوى" وبعدين يستقيل من الدنيا والأخرة مع بعض! ..
الأعجب من كل ده... ان في عز ثورة القطط الجعانة في كل قطاعات البلد وهي بتطالب بزيادة في "الأكل"..وبدل ما يزودوا القطط، فوجئت بالحكومة زودت أكل "الكلااااب " وسابت القطط تنونووووو!
وقتها تأكدت إن دهب خدعتنا وإن بنتها "حرية" لم تولد بعد ولا عزاء "لثورة" القطط ، وعرفت أنه مش مجرد حلم ، لكنه كابوس يوجع القلب"