"محسوب" يكشف تفاصيل مبادرات المصالحة

رد الدكتور محمد محسوب - وزير الشؤون القانونية والنيابية السابق - علي الاتهامات التي يسوقها البعض لرافضي الانقلاب العسكري بعدم قبول مبادرات المصالحة.
وأعلن محسوب عن رأيه في تلك المبادرات في صورة حوار تخيلي بينه وبين أحد مؤيدي احداث 3 يوليو ننقله كما هو :
- لماذا لا تقبلوا مبادرات المصالحة؟
* طب هي فين المبادرات دي؟
- عندك مبادرة الدكتور فلان والدكتور علان..
* طب هي السلطة الانقلابية قبلتها أو درستها أو أعلنت استعدادها مناقشتها؟؟
- لأ.. بس انتم اقبلوها وهم ها يتحرجوا ومش ها يلاقوا حل إلا قبولها..
* انت شايف إن الشعب المظلوم لازم يقبل أي مبادرة الأول علشان يحرج السلطة الغاشمة؟؟
- علشان هم السلطة وف إيديهم القوة والسلاح.. لازم انتم تتنازلوا الأول..
* طب انت شايف اهلنا في فلسطين.. فتح قبلت وجود اسرائيل.. وقبلت التنازل عن حق العودة.. وقبلت حل الدولتين.. وقبلت إن الدولة الفلسطينية تبقى ناقصة السيادة.. وقبلت سيادة مشتركة على القدس.. بس اسرائيل ما قبلتش حاجة خالص.. المشكلة إن مصريين هم اللي نصحوا فتح بقبول كل ده علشان يحرجوا إسرائيل قدام المجتمع الدولي..
- بس السيسي والحكومة مش يهود..
* بسي ظلمة اكتر من ظلمهم.. انقلبوا على سلطة منتخبة.. وقتلوا مصريين سلميين.. وحرقوا جثثهم.. ودمروا اقتصاد البلد.. واتبخرت مليارات بدون تفسير.. وعايزين يفرضوا علينا نظام حكم دكتاتوري بيخلي مصر أضحوكة.. تعالج الأمراض بالكفتة وتحل مشكلات المرور بمادة وهمية وتمنع بنا سد أثيوبيا بعقود بيع تلت أثيوبيا اللي عملها عبد الحميد الثاني..
- ع العموم اللي حصل حصل .. واحنا عايزين نحافظ ع دم المصريين ونمنع البلاد من الدخول في نفق مظلم..
* طب قوللي حل وأنا إيدي على إيديك.. قوللي ازاي ها نرجع حق الشهداء بالآلاف.. وازاي ها نحاسب اللي بدد الملايين.. وازاي مصر ها ترد 17 مليار للدول اللي سلفتهم لسلطة الانقلاب.. وازاي ها نرجع وديعة حرب الخليج.. وازاي ها نخرج المعتقلين ونعوضهم.. وازاي ها نعاقب اللي عذبوا.. وازاي....
- لأ لا لا .. استنى شوية.. لازم تنسى الكلام ده خااااالص.. لازم نبدأ من جديد..
* طب الشهدا....؟؟؟
- ربنا ها يدخلهم الجنة..
* طب الانقلاب على رئيس منتخب..
- احنا قدام واقع جديد..
*طب عودة النظام السابق..؟؟
- المصالحة بين الجميع بما فيهم نظام مبارك..
* طب الفلوس اللي دفعتها الإمارات والسعودية والكويت..؟؟
- دي ديون على مصر ها تردها ان شاء الله لما الظروف تتحسن..
* طب فلوس المعاشات اللي راحت ووديعة حرب الخليج..؟؟
- حكومة الببلاوي اجتهدت وغلطت وربنا يعوض علينا..
* طب المعتقلين والمحبوسين والقضايا المتفبركة..؟؟
- احنا القضا عندنا مستقل.. ودي مسائل يحكم فيها ويقرر مين يخرج ومين يتحبس..
* طب الرئيس المنتخب..؟؟
- دا متهم بالتخابر مع حماس والهروب من سجن مبارك والعدل يوم 29 يناير 2011..
* طب القوانين اللي صدرت بتحبس اي حد لأي مدة وبتمنع الطعن على بيع أصول الدولة؟؟
- دي الرئيس المؤقت أصدرها وهو رئيس أعلى محكمة واكتر واحد فاهم القانون..
* طب والديموقراطية..؟؟
- مصر مش جاهزة ليها.. والشعب المصري محتاج يتعلم..
* طب ميزانية الجيش..؟؟
- محدش يقدر يناقشها علشان أسرارنا العسكرية..
* بتاعة الكفتة؟؟
- سيبك من الكلام ده.. دا جهاز حقيقي من ابتكار لوا جامد..
* طب العيش والحرية والعدالة الاجتماعية..؟؟
- ها تحققها الحكومة الجديدة..
* بتاعت وزراء مبارك اللي فشلوا قبل كده ومتهمين بالفساد..؟
- لا بس دلوقتي احنا ف عصر جديد.. مفيش مبارك..
* بس فيه وزراءه..
- لكن بيقود البلد وجه جديد.. وجه وسيم..
* طب قوللي عايزينا نستسلم امتى؟؟
- دي مصالحة مش استسلام..
* يا أخي والله انت أدهشتني.. طب عايزينا نتصالح إمتى..؟؟
- استنى بقى أشوف المشير ها يقبل ولا لأ..
وانهي محسوب كلامه قائلا : أغلقت التليفون معه.. واستيقظت فجأة من نومي على ضجيج قادم من الطريق..
فتحت شباك الغرفة ونظرت إلى الشارع..
رأيت شابات وشباب يهتفون.. يسقط يسقط حكم العسكر.. ورأيت الشرطة على الجهة الأخرى تطلق الرصاص الحي فيسقط شباب بين مصابين وشهداء.. لكنهم يتجمعون من جديد.. يهتفون دون توقف.. ثوار أحرار ها نكمل المشوار
حاولت العودة للنوم لاتصل بالمجهول في الحلم.. حتى يسمع هذا الهتاف لربما استيقظ من نومه هو الآخر وأدرك أن الشعب مكمل حتى سقوط الانقلاب.. وهو لا ينتظر رد مجلسه العسكري.. بل على الجميع انتظار رد الشعب على هذا الظلم والقهر والإفقار..