صباحك عسل.. (حوار ظريف جداً)

* أثار انتخاب عمرو موسى رئيساً للجنة الخمسين لتعديل الدستور،ردود فعل عديدة ومتباينة فى الشارع المصرى"اللبَط"..وعلى اتساع دائرة ردود الأفعال،لم أقف إلا عند حوار دار بمقهى شعبى بين رجلين غاية فى الظرف وخفة الظل والذكاء..وإليكم الحوار:

انا شايفك "مبسوط شوية" لما عرفت ان عمرو موسى بقى رئيس لجنة الدستور..ياترى إيه السبب؟

= لأنه سياسى"معتَّق".

أتاريه كان بيقول:نحن لن نشرب من"كاس"اللجنة التأسيسية السابقة.

= انت مااخدتش بالك برضه لما قال سوف نمر بسلام من عنق"الإزازة"؟.

خدت بالى طبعاً..بس ماتعرفش موقفه إيه من وضع الكورة فى الدستور؟

= ماهو قال انه هايلغى الدورى.

امَّال الكورة هاتبقى إيه؟!.

= قال لك كفاية علينا "الكاس".

سيبك من الكورة..ماتعرفش قال إيه عن حق المواطن فى العلاج فى الدستور؟

= قال سوف نراعى ضميرنا فى صحة امرأتك،وفى صحة طفلك..و....."فى صحتك"!.